Bahan PJJ 22 – 28 Februari 2026

KULAKOKEN PERENTAH TUHAN

Ulangan 26:12-15

Persembahan persepuluhan

26:12 “Apabila dalam tahun yang ketiga, tahun persembahan persepuluhan, engkau sudah selesai mengambil segala persembahan persepuluhan dari hasil tanahmu, maka haruslah engkau memberikannya kepada orang Lewi, orang asing, anak yatim dan kepada janda, supaya mereka dapat makan di dalam tempatmu dan menjadi kenyang.
26:13 Dan haruslah engkau berkata di hadapan TUHAN, Allahmu: Telah kupindahkan persembahan kudus itu dari rumahku, juga telah kuberikan kepada orang Lewi, dan kepada orang asing, anak yatim dan kepada janda, tepat seperti perintah yang telah Kauberikan kepadaku. Tidak kulangkahi atau kulupakan sesuatu dari perintah-Mu itu.
26:14 Pada waktu aku berkabung sesuatu tidak kumakan dari persembahan kudus itu, pada waktu aku najis sesuatu tidak kujauhkan dari padanya, juga sesuatu tidak kupersembahkan dari padanya kepada orang mati, tetapi aku mendengarkan suara TUHAN, Allahku, aku berbuat sesuai dengan segala yang Kauperintahkan kepadaku.
26:15 Jenguklah dari tempat kediaman-Mu yang kudus, dari dalam sorga, dan berkatilah umat-Mu Israel, dan tanah yang telah Kauberikan kepada kami, seperti yang telah Kaujanjikan dengan sumpah kepada nenek moyang kami–suatu negeri yang berlimpah-limpah susu dan madunya.”

Ulangen 26:12-15

26:12 Tiap tahun peteluken bereken persembahen persepuluhenndu, e me sepersepuluh i bas ulih jumandu, man kalak Lewi, kalak pertandang, anak-anak melumang, ras man diberu balu-balu, maka i bas tep-tep perpulungen bias nakan si iperlukenna. Kenca enggo ibanndu bage, 
26:13 kataken lah man TUHAN, ‘Lanai lit tading persembahen persepuluhen e i bas rumahku erkiteken enggo kubereken e man kalak Lewi, kalak pertandang, anak-anak melumang, ras man diberu balu-balu rikutken si iperentahkenNdu maka kulakoken e. La kusimbak, ras la aku lupa sada pe perentah-perentahNdu kerna persembahen persepuluhen e.
26:14 Sanga aku erceda ate pe labo e kupan. Sanga aku la bersih rikutken peraturen agama pe labo sitik pe kubaba persembahen persepuluhen e ndarat i bas rumahku nari. La kubereken sitik pe man persembahen kalak mate. Enggo kuikutken kam o, TUHAN. Enggo kulakoken kerina perentahNdu kerna persembahen persepuluhen e.
26:15 Nehenlah ku teruh i bas inganndu si badia nari i Surga janah pasu-pasulah bangsandu Israel. Bereken pe pasu-pasuNdu man negeri si dem kebayaken ras mehumur enda sue ras si ipadankenNdu man nini-nini kami.’ ”

(Persembahen Perpuluhen)

MODEL PJJ: KESAKSIAN

KATA PERLEBE

Persepuluhen man kalak Israel eme kewajiben guna mereken sepersepuluh i bas ulih rani, asuh-asuhen, bage pe ulih pencarin si deban man Tuhan. Persepuluhen ipake guna mendukung pelayanen para imam, kalak Lewi, bage pe keperlun i bas Rumah Pertoton. Persepuluhen eme sada aturen si itetapkan Tuhan i bas kitab Taurat dingen jadi kewajiben man tep-tep kalak Israel guna ilakoken. Selain kewajiben, persepuluhen ianggap sebagai pengataken bujur dingen tanda kepatuhen man Tuhan erkiteken pasu-pasu si enggo iberekenNa. Adi sikawitken temanta ras penekanen bahan PJJ nta i bas minggu enda banci sibuat kesimpulenna maka; nehken persembahen persepuluhen eme salah sada perentah Tuhan si arus silakoken. Genduari perentah e iayuken gerejanta jadi sada keputusen eme salah sada jenis persembahen guna ncukupi keperlun pelayanen gerejanta eme nehken “bagin perpuluhen”.

ISI

Kerna Persembahen ulih juma sipemena (buah sulung) enda ilakoken kenca kalak Israel tading dingen ngiani taneh perpadanen janah enggo rulih peraninna. Persembahen enda tuhu-tuhu iaturken alu mehuli situjunna eme mpersingeti maka bangsa enda ndube lit i bas kiniseran/perbudaken i Mesir sope ibebasken Tuhan. Genduari Tuhan enggo mbebasken bangsa enda dingen masu-masu pendahinna seh mereken ulih. Ndube ia budak dingen man arah tuanna nari, genduari bangsa Israel enggo bebas dingen ngasup nehi keperlunna jine. Alu bage, persembahen ulih juma sipemena enda rehna i bas pusuh peraten simbagesna nari guna ngataken bujur man Tuhan i bas kiniulinNa si enggo mereken pasu-pasu si simpar man bangsaNa. Arah persembahen enda pe bangsa Israel ngaku maka lit kap hak Tuhan i bas kai si enggo ialokenna e.

Bahanta enda eme pengulangen kerna Undang-undang persepuluhen si lit i bas Ulangen 14:22-29, situjunna eme guna mpersingeti bangsa Isarel maka ulih pendahinna e labo terjeng man bana ngenca tapi guna Tuhan ras guna teman si deban si tuhu-tuhu perlu man sampaten eme: kalak Lewi, pertandang, anak melumang ras diberu balu-balu. Persembahen ulih juma sipemena eme man Tuhan (ay 1-11) la terlepas ras persembahen maka kalak si deban si tuhu-tuhu perlu man sampaten (ay 12-15). Persembahen Perpuluhen tiap tahun peteluken ipakeken guna nampati teman si deban niakap seri nilaina/maknana ras persembahen guna rumah pertoton Tuhan sabab siapai pe nehken perentah Tuhan.

I bas bahanta enda pe ituriken uga arusna kalak Israel nehken persembahenna alu disiplin dingen jujur sabab kalak siman sampaten e ndai tuhu-tuhu kal ngarapken persepuluhen arah bangsa e nari. Misalna; kalak Lewi eme sada suku si la dat taneh i bas pembagin kalak Isarel ndube sabab ia erdahin i bas Rumah Pertoton, e maka seninana me mereken sikerajangenna arah sepersepuluh ulih jumana nari. Kalak pertandang, anak melumang ras diberu balu-balu eme kalak si geluhna bergantung kal nandangi persembahen e, la ia ngasup nerusken kegeluhenna arah usahana jine. Tambah sie pe, bangsa Israel arus tetap njaga kebadian persembahen persepuluhenna e. Cara njaga kebadian e eme: alu la makekenca aminna pe sangana erceda ate, la ka iendeskenna sanga ia la bersih rikutken aturen agama (lit kontak ras mait subuk manusia entah pe binatang, entah kontak ras kalak si pinakit tertentu, tah terpan pangan haram) dingen la ngendeskenca nandangi man kalak mate (desken sesajen). Alu bage, persembahen ulih juma e tuhu-tuhu kal ijaga kebadianna erkiteken itujuken man Tuhan.

Kenca sie, bangsa Israel isuruh mindo man Tuhan gelah IA tetap mperdiateken kegeluhen bangsaNa, alu masu-masu kerina pendahinna. Tuhan mereken kebayaken ras taneh simehumur man bangsaNa sue ras kai si enggo ipadanken Dibata man bangsaNa.

PENGKENAINA

Gerejanta pe enggo erbahan Persembahen persepuluhen enda jadi salah sada jenis persembahen si banci mendukung dana pelayanen gerejanta subuk Koinonia, Diakonia bage pe Marturia. Memang dari segi jumlah (1/10) labo jadi keharusen man perpulungen, e maka ibahan me gelarna i bas gerejanta “bagin perpuluhen”, aminna gia lit nge ngawanta tetap mereken persepuluhenna erpalasken jumlah siialokenna. Amin bage gia siilakoken gerejanta, ula ka min erbahanca e erbahanca kita mekarus i bas nehken bagin perpuluhenta. Piga-piga hal penungkunen sijadi perenungenta i bas nehken perpuluhen enda eme: Kai nge palasta mere bagin perpuluhen; aturen gereja entah pengataken bujur man Tuhan erkiteken ulih peranin? Enggo nge metunggung beliganna bagin perpuluhenta?

Banci jadi i bas piga-piga ingan mesera kal siakap nggerakken perpulungen bage pe serayan guna nehken perpuluhen. Mbue kal alasen simegati sibegi; umpamana perpuluhen la pernah iajarken Jesus, perpuluhen eme tradiri Padan Si Ndekah, la teologis ras si debanna. Kerna si enda perlu kal kita mbages rukur, me payo nge tep-tep rani Tuhan lebe siinget dingen sikataken bujur man baNa? E maka adi bagin perpuluhen e eme ulih sipemena i bas kita rani, tentu meriah ukurta ngendeskenca, adi kerna jumlah ukurta meriah sibahan palasna. Lebih asa sie, penggunan persepuluhen enggo nge jelas sieteh eme guna kas umum sibanci ipakeken guna nampati kerina dahin-dahin gerejanta si pembaginna 60% tading i bas Runggun janah 40% isetor ku Moderamen. Ras si isetorken ku moderamen enda ipakeken guna pelayanen sebelang-belang GBKP enda. Jadi bagin perpuluhenta enda tuhu-tuhu kal nampati kelancaren dahin gerejanta. Alu bage aminna gia la iwajibken, me tanggung jababta nge kerina guna natang-natang gereja Tuhan. Erkiteken sie, arah bahan PJJ nta, mulihi kita ipersingeti gelah tetap ikut muat bagin i bas ngendesken bagin perpuluhenta.

DISKUSI :

1. Turiken pengertinta kerna persembahen perpuluhen erpalasken bahan PJJnta wari enda!
2. Uga pengangkanta kerna “bagin perpuluhen” i bas gerejanta sedekah enda, janah uga keikutsertanta guna ndalankenca?

USULEN ENDE-ENDEN:

1. KEE GBKP 315:1, 2
2. KEE GBKP 343:1, 2
3. KEE GBKP 302:1, 2
4. KEE GBKP 16:1