Bahan PJJ 29 Maret – 04 April 2026

MUAT BAGIN I BAS BERITA SI MERIAH

2 Timotius 1: 3 – 8

Ucapan syukur dan nasihat untuk bertekun

1:3 Aku mengucap syukur kepada Allah, yang kulayani dengan hati nurani yang murni seperti yang dilakukan nenek moyangku. Dan selalu aku mengingat engkau dalam permohonanku, baik siang maupun malam.
1:4 Dan apabila aku terkenang akan air matamu yang kaucurahkan, aku ingin melihat engkau kembali supaya penuhlah kesukaanku.
1:5 Sebab aku teringat akan imanmu yang tulus ikhlas, yaitu iman yang pertama-tama hidup di dalam nenekmu Lois dan di dalam ibumu Eunike dan yang aku yakin hidup juga di dalam dirimu.
1:6 Karena itulah kuperingatkan engkau untuk mengobarkan karunia Allah yang ada padamu oleh penumpangan tanganku atasmu.
1:7 Sebab Allah memberikan kepada kita bukan roh ketakutan, melainkan roh yang membangkitkan kekuatan, kasih dan ketertiban.
1:8 Jadi janganlah malu bersaksi tentang Tuhan kita dan janganlah malu karena aku, seorang hukuman karena Dia, melainkan ikutlah menderita bagi Injil-Nya oleh kekuatan Allah.

Pengataken bujur ras pengajuk

1:3 Bujur kukataken man Dibata, si kusembah alu tutus, bagi nini-niningku nai. Bujur kukataken man Dibata asum kuinget kam rusur i bas pertotonku subuk suari bage pe berngi. 

1:4 Kuinget kuga pertangisndu, janah mesikel kal aku jumpa ras kam gelah meriah kal min kuakap. 

1:5 Kuinget tutus atendu erkiniteken bali ras kiniteken nini tudungndu Lois ras nandendu Enike. Tek aku maka i bas kam pe lit kiniteken si bage.  

1:6 Erkiteken si e kupersingeti man bandu gelah gara mulihken i bas kam pemere Dibata, si ialokenndu asum kutamaken tanku i babo takalndu. 

1:7 Sabap Kesah si ibereken Dibata man banta labo erbahanca gelah kita percik-cik; tapi KesahNa e ndemi kita alu kuasa, kekelengen, bage pe gelah ngasup kita ngkuasai dirinta.

1:8 E maka ola kam mela ersaksi kerna Tuhanta; bage pe ola kam mela kerna aku si ipenjaraken erkiteken Kristus. Tapi buat baginndu i bas kiniseran guna Berita Si Meriah bagi ibereken Dibata man bandu gegeh guna si e.

(Perpulungen Jabu-Jabu Intergenerasional)

ILAKOKEN ALU SISTEM JETRO MODEL PJJ: KESAKSIN

KATA PERLEBE

PJJ-nta sendah menekanken kerna Perpulungen jabu-jabu Intergenerasional (antargenerasi). PJJ Intergenerasional bas gerejanta aturna kin i bas PJJ e reh kerina perpulungen i bas kerina umur, dilaki bage pe diberu si ibedaken alu kategorial (kategorial si lit e me kap: mamre, moria, permata, KAKR, ras Saitun). Ibadah/PJJ Intergenerasional labo terjeng ibadah gabungen, tapi ibadah si menyapa kerina kesusuren ntah pe terpuk (generasi) ras jadi ingan man kerina generasi guna aktif muat bagin i bas ibadah/PJJ e. Bage pe, kerina generasi iarapken mereken erbage rupa nandangi ibadah e.1 Model PJJnta i bas ibadah Intergenerasional enda kerna model kesaksian. Iarapken maka kerina generasi si reh i bas PJJ-nta muat bagin nuriken pandangenna i bas Berita Si Meriah. Bali bagi bahan oratenta sendah kerna turin-turin Timotius ras nandena Enike, bage pe ninina si Lois bas muat bagin i bas Berita Si Meriah.

ISI

Wujud intergenerasional lit bas tep-tep jabu. Tep-tep anggota jabu lit i bas erbage-bage generasi. Tep-tep generasi tentu saja lit ke-khas-en bas ia tupung ia rukur, ertindak, ras ngerana. Seh maka penting kel nge komunikasi bas jabu, i bas ngelakoken dahin, bage pe ibadah perlu i bangun alu pendekaten intergenerasional. Alu bage lit penggejapen maka i bas keluarga, ibadah ras dahin si debanna e mekap pendahinta ras erkiteken kerina muat bagin.

Timotius e me kesusuren i bas percampuren kalak Junani ras Jahudi. Timotius reh i bas kota Listra, wilayah Likaonia (Asia kitik). Bapana sekalak kalak Junani, tapi nandena si Enike ras ninina si Lois kesusuren kalak Jahudi. Ninina si Lois kalak si erkemalangen man Tuhan. Seh maka tradisi percampuren intergenerasional terus isusurkenna ku anakna Enike bage pe kempuna si Timotius. Amin gia bapa Timotius kalak Junani, tapi ia tading ras mbelin-mbelin i daerah non Jahudi, tapi e la jadi alasen man keluarga guna la ngajarken ia kerna Dibata mulai kitik-kitikna nari.

Tupung Timotius nguda denga ibahan Rasul Paulus ia jadi temanna guna ndahiken dahin pelayanen. Timotius kalak si tutus i bas pelayanen ras ijadiken Paulus pe ia jadi anak rohanina, anak si kelengina. Paulus i bas nuratken surat pastoral man Timotius ia nehken kekagumenna nandangi Timotius si nguda denga, bage pe la erngadi-ngadi notoken Timotius tupung lit kesempaten. Sabab tanggungjabab Timotius guna nehken berita simehuli e me kap tanggung jabab simbelin. Paulus nuriken proses si nialaken Timotius, baik tupung Timotius tangis bas proses e (ay. 4), iidah Paulus maka Timotius ertutus ate, bage pe ngusih kiniteken ninina Lois ras nandena Enike (ay. 5). Paulus pe ningetken Timotius maka Kesah si ibereken Dibata erbahanca kerina perBerita Si Meriah la percik-cik; tapi Kesah Dibata e ndemi perBerita Si Meriah alu kuasa, kekelengen, bage pe kengasupen ngkuasai diri. Arapen Paulus si mbelinna gelah Timotius tetap nehken Berita Si Meriah, la perlu mela ersaksi kerna Tuhan; bage pe ula mela kerna Paulus si sangana i bas penjara erdandanken Kristus (ay. 8).

Joas Adiprasetya, “Gereja Intergenerasioal: Telaah Eklesiologis” dalam buku, Pembangunan Jemaat Intergenerasional, Ed: Wisnu Sapto Nugroho (Semarang: GKI Sinode Jateng, 2022)

PENGKENAINA

Timotius ertanggung jabab nehken Berita Si Meriah erkiteken ia iajari kitik-kitik nari berperan i tengah-tengah jabuna bage pe enggo semal guna ndahiken lagu langkah si mehuli. Timotius ibereken kesempaten guna er-kolaborasi bas ndahiken kerina pendahin ras ritual peribadahen ras ninina Lois bage pe nandena Enike, ras kerina keluarga. Bapa Timotius pe ndukung Timotius gelah turah ras reh mbelinna i bas Dibata ras i bas kerina si mehuli. Jenari Timotius ndatken kesempaten guna i didik Paulus, seh maka kai si ndube idatkenna bas jabuna enda iterusken seh ia mbelin i teruh pengajaren Paulus. Timotius ngasup guna ngepkep perpulungen ras tetap nehken Berita Si Meriah. Berita Si Meriah e teridah arah perbahanenna, pengeranana, perukurenna amin gia nguda denga ia enggo banci jadi usihen. Seh maka perpulungen la mapas ngenen Timotius si nguda denga. Ulih kehangaten intergenerasional bas Timotius mabai ia jadi kalak si ngasup nehken Berita Si Meriah.

DISKUSI :

1. Diskusiken, kai si erbahanca megati i bas jabu mesera guna erkerjasama antara anak, bapa, ras nande?
2. Hal kai kira-kira si mbelin ngaruhna guna ilakoken secara kerjasama antara anak, bapa, ras nande?

GAMES :

Peserta PJJ isusun i bas sada kelompok si isina i bas tep-tep generasi. Itamaken kertas kosong itengah-tengah kelompok, e maka tep-tep kelompok kari nggambar rumah, tapi sanga nggambar ipitpitkenna matana, ras banci arih-arih. Tupung kelompok e nggambar moderator mereken waktu, ras mperdiateken kelompok si nalangi mata. Janah iarapken tep-tep peserta bas kelompok kerinana ikut muat bagin. Kenca dung inen apai gambar rumah kelompok e jenari i foto ras sibagiken ku sosial media alu hashtag #pjjintergenerasionalgbkprumahkita

USULEN ENDE-ENDEN:

1. Jalan serta Jesus
2. Takal Bara
3. KEE GBKP 257:1-2 Siberitaken Berita Si Meriah
4. KEE GBKP 88:1-2 Berita Si Mehuli
5. KEE GBKP 124:3 Ipasu-pasu Tuhan Dibatandu
6. KEE GBKP 289:1- Lalap Sikataken Bujur

DAFTAR BACAAN :

• Pustaka Si Badia, (Jakarta: LAI, 2013)
• Adiprasetya, Joas, “Gereja Intergenerasioal: Telaah Eklesiologis” dalam buku, Pembangunan Jemaat Intergenerasional, Ed: Wisnu Sapto Nugroho (Semarang: GKI Sinode Jateng, 2022)