Tanggal 05 - 11 Oktober 2025

ERGUNA KAP TEMAN MAN BANGKU

Philemon 1:11-16

1:11 Nai la ia erguna man bandu, tapi genduari erguna ia labo saja man bandu tapi man bangku pe.

1:12 Buah ateku si kukelengi enda, genduari kusuruh mulihken man bandu.

1:13 Si tuhuna ateku min i jenda nge ia ras aku, kidekah aku i bas penjara erkiteken Berita Si Mehuli, gelah banci ia jadi gancihndu nampati aku.

1:14 Tapi la ateku kupaksaken kam nampati aku; ateku min si e ibahanndu alu ukur meriah. Alu bage la aku nggit erbahan kai pe adi la leben isetujuindu.

1:15 Banci jadi si Erguna sirang ras kam kentisik gelah banci ia ras kam rasa lalap.

1:16 Genduari lanai bo ia budak ngenca, tapi ndauh ganjangen asangken sekalak budak. Ia me seninandu si meherga i bas Kristus. Keleng ateku ia, tentu lebihen ka pe kekelengenndu man bana, subuk selaku manusia bage pe i bas Tuhan.

Filemon 1:11-16

1:11 Dahulu ia tidak berguna untukmu, tetapi sekarang ia berguna, bukan saja untukmu, tetapi untuk saya juga.

1:12 Sekarang orang yang saya kasihi itu saya kirim kembali kepadamu.

1:13 Sebenarnya saya ingin menahan dia bersama saya sebagai penggantimu, supaya ia bisa membantu saya, selama saya ditahan dalam penjara ini karena memberitakan Kabar Baik dari Allah.

1:14 Tetapi saya tidak mau melakukan apa-apa kalau Saudara belum memberi persetujuan. Saya lebih suka kalau Saudara melakukannya dengan kerelaan hati sendiri; saya tidak mau memaksamu.

1:15 Mungkin Onesimus berpisah dari Saudara untuk sementara waktu supaya Saudara bisa mendapat dia kembali untuk selama-lamanya.

1:16 Sekarang ia bukan hanya seorang hamba untuk Saudara; ia lebih dari itu. Ia adalah sesama orang Kristen yang tercinta. Ia berguna sekali untuk saya, apalagi untukmu! Tentu ia berguna sekali baik sebagai hamba maupun sebagai seorang saudara di dalam Tuhan!

(Kekerabatan)

MODEL PJJ: BUDAYA

KATA PERLEBE:

Selaku perpulungen Tuhan, kita erlajar mereken kesempatan man temanta si deban guna muat bagin bas ndahiken dahin si mehuli. Sebab situhuna kerina kita lit nge potensinta/kiniliten sekalak-sekalak bas dahin si mehuli e. Erlajar kita bagi Paulus ngenena alu payo potensi si lit bas si Erguna aminna ia sekalak budak nge ngenca. Ula mis lit min perukuranta, "kai ka kin banci bahanna, adi ia pe bagah kal ngenca?" Lenga tentu, banci saja lit nge kelebihenna si erguna ka man banta. Si terpenting lebe nggit kita ngaloken temanta e janah mereken kesempatan man bana guna ikut muat bagin bas dahin-dahin si mehuli.

ISI:

Kai pe statusna, kai pe sekolana, kai pe pangkatna si tuhuna lit nge guna man banta. Terlebih ka kita i bas sada perpulungen, si lit hubungen perkade-kadenta, si nggeluh i bas keleng ate Tuhan pastina erguna kal teman e man banta. Mekatep la si sedari si e, seh maka tempa la lit si akap gunana erteman erbahansa kurang siergaken teman e bas kegeluhenta. E maka arah PJJnta sekalenda iajuk me kita guna banci ngergaken temanta, kalak si deban si i sekelewetta si ijinken Tuhan reh bas kegeluhenta.

Teks renungen PJJ nta i bas Minggu enda salah sada surat Rasul Paulus si ituliskanna tupung bas penjara. Surat enda isehken man Philemon, ia sekalnak ngawan perpulungen i Kolose si seh kal atelena kelengna perpulungen Tuhan seh maka rumahna pe ijadiken ingan pulung perpulungen (Philemon 1:2). Lit sekalak budakna si Erguna (Onesimus) gelarna. Kemungkinan si Erguna enda lawes nadingken Kolose ergiteken ia enggo ersalah, entah enggo rutang nandangi erkiteken ia enggo ersalah, entah enggo rutang nandangi erkitken tuanna, Philemon (ay. 18). E maka lawes ia, jumpa ras Paulus i penjara. Sanga jumpa i penjara enda me Paulus mabai ras ngajari si Erguna enda ku bas kegeluhen si mehuli, seh maka Paulus pe enggo ngakuken man Philemon maka si Erguna e enggo jadi anakna (ay. 10). Ertina enda nuduhken maka si Erguna enggo ncidahken perubahen geluhna si mehuli. Ije enda Paulus nuriken kerina perubahen si lit bas diri si Erguna, adi nai la ia erguna man Philemon tapi gunduari erguna nge ia, erguna ka pe man Paulus (ay. 11). E maka bas konteks si enda me Paulus nehken pemindon man Philemon guna ngaloken si Erguna si isuruhna mulihken ku Kolose (ay. 12). I bas pemindon si isehken Paulus enda tersirat ka pengajaren man Philemon maka si enggo jadi situhuna gelah mpekena hubungenna ras si Erguna, segelah si Erguna e banci jadi temanna ngelai perpulungen i Kolose (ay. 15). Ngarap kal Paulus segelah Philemon la terjeng ngaloken si Erguna mulihken selaku budak tapi lebihan asangken si e, jadi senina si meherga i bas Kristus. Ija ituriken Paulus maka keleng atena si Erguna janah tek kal ia maka Philemon pe keleng ka nge atena si Erguna enda subuk selaku teman manusia bagepe selaku perpulungen Tuhan (ay. 16).

 PENGKENAINA:

Arus sisedari maka kalak sideban e pe lit nge kelebihenna, bas bidang-bidang tertentu banci saja litten bas ia kengasupen e. Ije enda me perlu biak si la mecimberu entah pe erbanding-banding kita i bas kelebihen-kelebihen temanta ndai. Ia pe lit kelebihenna, kita pe lit nge kelebihennta sekalak-sekalak. I bas si e ngasup min kita ngalokenna terlebih ngakukenca kelebihen – kelebihen kalak si deban seh maka ia turah persaingen si la sehat sapih – sapih kita.

Paulus i bas ndahiken dahin pebelangken Berita Si Meriah labo si sada. Tuhu igejapkenna maka labo ngasup adi si sada ia ndahiken dahin e, e maka iikutkenna pe Silas, Timotius, Titus seh Philemon jine pe jadi temanna guna ngelai perpulungen Tuhan si enggo mbue ras reh teremna bas erbage-bage ngenan. Kinatana kita pe bage nge, labo kita ngasup ndahiken dahin e si sada. Selain terbatas gegehta, terbatas waktunta, banci jadi bas dahin tertentu terbatas ka nge kebeluhen ras kinilitenta. Akukenlah maka ije kita me perlu nandangi kalak si deban guna jadi temanta ndahiken dahin si mehuli e, bagi dahin pelayanen bas perpulungen. Bagi sada batang purih, adi sada ngenca labo terdungi dahin napui kesain rumah, tapi adi reh buena batang purih ndai seh maka iiket meteguh jadi sada banci menukah ndungisa dahin napui kesain ndai.

Kedungenna si ingetlah maka selaku perpulungen GBKP lit visi si perlu tersehi e me: "Menjadi Kawan Sekerja Allah untuk Menyatakan Rahmat Allah kepada Dunia". Guna tersehi visi enda ndai maka iaturken tata nilai e me prinsip-prinsip geluh si erpalasken kata Dibata sijadikan jadi sinumpak-numpak, simaba ngaruh ras sinuriken kai si perlu ilakoken ras uga ngelakokenna selaku gereja. Tata nilai enda me si erguna mbuat kita selakú warga gereja i bas ndalani ras muat keputusan-keputusan bas kegeluhenta. Bas gerejanta enggo ipilih lima tata nilai Kristiani si niarapken cocok ras masa sigundari guna terus idalanken jadi sada kebiasaan nggeluh, salah sadana e me kekerabatan/perkade-kaden. Iarapken maka selaku warga gereja, kita pe terbuka entah ngasup guna ngaloken kalak si deban i bas kerjasama segelah jadi sada pengalohin si erguna bas tengah-tengah kegeluhenta. Sikap terbuka entah nggit ngaloken kalak si deban guna ras-ras kita erdahin e teridah min arah kita sisampat-sampaten, saling ngergaken pendahin sapih-sapih kita aminna pelain-lain gia bidang keahlianta. Tentuna segelah kerina e njadikan kegeluhenta jadi mehuli.

DISKUSI:

 * Erpalasken teks Philemon 1:11-16, kai nge sierbahanca maka Rasul Paulus nuruh Philemon gelah ialokenna Onesimus (Erguna) jadi seninana i bas Kristus?

 * Kai nge si erbahanca maka megati denga mesera menjalin kerja sama subuk i perpulungen, gereja ras masyarakat? Turiken!

USULEN ENDE-ENDEN:

 * KEE GBKP No. 278:1,3

 * KEE GBKP No. 209:1,5

 * KEE GBKP No. 315:1,4

 * KEE GBKP No. 381:1-2

Pdt. Andinata Ginting, S.Si (Teol)