Ngaloken kerina kecibal ceda ate tah meriah ukur alu mehuli Kegeluhenta lit tetap bas perbeben

BIMBINGAN PA SAITUN GBKP TAHUN 2025

TANGGAL, 19 - 25 OKTOBER 2025

Ogen   : Jop 1:13-22

Anak-anak Jop ras kebayakenna Ikernepken

Indonesia:

1:13 Pada suatu hari, ketika anak-anaknya yang lelaki dan yang perempuan makan-makan dan minum anggur di rumah saudara mereka yang sulung,

1:14 datanglah seorang pesuruh kepada Ayub dan berkata: "Sedang lembu sapi membajak dan keledai-keledai betina makan rumput di sebelahnya,   

1:15 datanglah orang-orang Syeba menyerang dan merampasnya serta memukul penjaganya dengan mata pedang. Hanya aku sendiri yang luput, sehingga dapat memberitahukan hal itu kepada tuan."

1:16 Sementara orang itu berbicara, datanglah orang lain dan berkata: "Api telah menyambar dari langit dan membakar serta memakan habis kambing domba dan penjaga-penjaga. Hanya aku sendiri yang luput, sehingga dapat memberitahukan hal itu kepada tuan."

1:17 Sementara orang itu berbicara, datanglah orang lain dan berkata: "Orang-orang Kasdim membentuk tiga pasukan, lalu menyerbu unta-unta dan merampasnya serta memukul penjaganya dengan mata pedang. Hanya aku sendiri yang luput, sehingga dapat memberitahukan hal itu kepada tuan."

1:18 Sementara orang itu berbicara, datanglah orang lain dan berkata: "Anak-anak tuan yang lelaki dan yang perempuan sedang makan-makan dan minum anggur di rumah saudara mereka yang sulung,

1:19 maka tiba-tiba angin ribut bertiup dari seberang padang gurun; rumah itu dilandanya pada empat penjurunya dan roboh menimpa orang-orang muda itu, sehingga mereka mati. Hanya aku sendiri yang luput, sehingga dapat memberitahukan hal itu kepada tuan."

1:20 Maka berdirilah Ayub, lalu mengoyak jubahnya, dan mencukur kepalanya, kemudian sujudlah ia dan menyembah,

1:21 katanya: "Dengan telanjang aku keluar dari kandungan ibuku, dengan telanjang juga aku akan kembali ke dalamnya. TUHAN yang memberi, TUHAN yang mengambil, terpujilah nama TUHAN!"

1:22 Dalam kesemuanya itu Ayub tidak berbuat dosa dan tidak menuduh Allah berbuat yang kurang patut.

Karo:

1:13  I bas sada wari, asum anak-anak Jop erpesta man-man i bas rumah seninana sintua,

1:14 reh sekalak kiam-kiam maba berita man Jop. Nina man Jop, "Asum kami sangana nenggalaken lembu, kalde pe nggagat i bas mbalmbal deherkenca,  

1:15 rempet reh kalak Seba, iserangna jenari irampasna kerinana. Ibunuhna kerina suruh-suruhenndu, aku ngenca pulah lako meritakenca man bandu."

1:16 Ope denga ia dung ngerana, nggo ka seh suruh-suruhen si deban nina, "Biri-biri ras permakanna nggo keri mate idumpang perkas. Aku ngenca pulah lako meritakenca man bandu."

1:17 Ope denga ia dung ngerana, reh ka suruh-suruhen si deban nina, "Kami iserang telu terpuk gerombolen kalak Kaldea. Unta-unta irampasna, janah kerina suruh-suruhenndu ibunuhna, aku ngenca pulah lako meritakenca bandu."

1:18 Ope denga ia dung ngerana, reh ka suruh-suruhen si deban nina, "Asum anak-anakndu man-man i rumah anakndu sintua,

1:19 rempet rembus angin meter i gurun pasir nari. Meruntuh rumah e iembusna, janah mate kerina anakndu ibahanna. Aku ngenca pulah lako meritakenca man bandu."

1:20 Kenca bage tedis Jop janah icaingkenna uisna perban cedana atena. Iguntingna buk takalna, kenca bage nembah erjimpuh ia, ayona seh ku taneh.

1:21 Nina, "Kadeku pe la lit asum aku tubuh nai, mate pe aku la pedah lit kadeku pe. TUHAN nai si merekenca, genduari nggo ka IbuatNa. Terpujilah GelarNa."

1:22 I bas kerina kejadin enda ndai Jop la erdosa, sabap la ia nggit nalahken Dibata.

Thema : KALAK GELUH LA LEPAS I BAS MASALAH

Tujunna:

Gelah Saitun:

1. Tetap ngasup ngaloken kinata kegeluhen enda lit bas masalah.

2. Nginget cara naluken masalah e me kap alu ngarapken gegeh Dibata.

Metode : Diskusi

I. BENA KATA

Lit kuan-kuan si ngatakenca, "Hidup ini seperti roda yang berputar, terkadang kita berada di atas, terkadang berada di bawah." Kuan-kuan enda ncidahkenca man banta maka la lit si tetap i bas kegeluhen enda. La lit kegeluhen si bagi jalan tol, lancar aman sekelewet benaken tubuh nari seh nadingken doni enda. Pasti lit sehat - sakit; mbur - kertang; untung -rugi; riah ukur - ceda ate; tawa - tangis; rsd. I bas si e tentu erbage-bage pengalokenta i bas ndalanisa. Man banta kalak si erkiniteken tentu iarapken gelah tetap ngataken bujur i bas kerina kecibal.

I bas kesempaten enda radu ras kita erlajar arah Jop nari i bas ia ngaloken kai pe si terjadi i bas kegeluhenna alu gegeh si rehna i bas Dibata nari.

II. MPEBAGESI OGEN

Ogenta sendah nuriken kerna sekalak tokoh Alkitab si akap kami enggo semal sioge ntah sibegi e me Jop entah pe Ayub. Ituriken i bas bindu 1:1-3 maka Jop enda tading i negeri Us. Negeri Us enda enggo lanai siteh i ja lokasina gundari. I bas negerina banci ikataken Jop enda sekalak si bayakna, Jop pe ituriken sebage kalak si mehuli, la lit perbahanenna si jahat, tuhu-tuhu nggeluh ersembah ras erkemalangen man Dibata. I bas bindu 1:8 ikataken Dibata, "Iperdiatekenndu nge suruh-suruhenku Jop? Nina TUHAN nungkun. "La lit sekalak pe i babo doni si bagi ia patuhna ras ulina. Isembahna Aku janah la lit si jahat si ilakokenna." Lit sada ndehara Jop, pitu anak dilaki, ras telu anak diberu, kerinana la tersinget gelarna.

Perikop si jadi ogenta sendah lit i teruh judul "Anak-anak Jop ras kinibayakenna ikernepken." Sope turi-turin si jadi ogenta sendah, lit percakapen antara Tuhan Dibata ras Iblis, i bas ay. 6-12. I bas percakapen e teridah maka bencana si ialami Jop e me pencobaan i bas Iblis nari, sebab iakap Iblis, Jop nembah man Dibata erkiteken kinibayaken si lit i bas ia, geluhna sikap la lit alangen kai pe, ikawali ras ipasu-pasu Dibata geluhna. I bas ay. 11 ikataken Iblis, "Tapi genduari, bicara ibuatNdu kerina si lit i bas ia, ugapa pe isumpahina Kam i adep-adepenNdu." I bas si e Dibata mereken izin man Iblis guna ncubai Jop.

I bas ogenta sendah banci siidah uga mberatna percuban si ialami Jop. Istilah i bas jaman gundari enda nina, "terstruktur, sistematis, dan masif." I bas sada wari keri kerina si lit i bas Jop. Ibenaken lembuna si seribu ras keledena si lima ratus, bene irampas kalak Seba, janah suruh-suruhen Jop pe mate ibunuh. Selanjutna, biri-birina si pitu ribu rikut permakan-permakanna, mate kerina idumpang perkas (disambar petir). Selanjutna, untana si telu ribu, bene irampas kalak Kaldea, janah suruh-suruhen Jop pe mate ibunuh. Si terakhir i bas perikop ogenta sendah ituriken maka mate kerina anak-anak Jop kena runtuhen rumah erkiteken angin meter si rembus arah gurun pasir nari. Uga kira-kira perasaanta adi si bage terjadi i bas geluhta? Mungkin adi erta kinibayaken si bene, labo masalah ninta, amin pe gulut ukurta, si penting nggeluh denga anak-anakta.

Uga respon Jop? I bas ay. 21-22 ituriken, "Nina, "Kadeku pe la lit asum aku tubuh nai, mate pe aku la pedah lit kadeku pe. TUHAN nai si merekenca, genduari enggo ka ibuatNa. Terpujilah gelarNa." I bas kerina kejadin enda ndai Jop la erdosa, sebab la ia nggit nalahken Dibata." I bas keadaan ceda ate, ngasup denga ia muji gelar Tuhan. Amin pe perbeben siinanamina ndai labo erkiteken kesalahenna.

III. PENGKEΝΑΙΝΑ

Adi nggeluh denga kita i tengah-tengah doni enda, enggo pasti lit masalah, persoalen, perbeben, entah pe kiniseran. Lit si ngatakenca, "Lit sada ingan si la lit je masalah, persoalen, perbeben, entah pe kiniseran, e me kuburen." Ertina adi nggeluh denga ateta i tengah doni enda, harus nggit kita ngaloken ugapa pe kondisi entah pe situasi geluhta. Tapi i bas dampar si deban harus ka kita nggit mengevaluasi diri. Kai nge persoalen, perbeben, entah pe kiniseran si kunanami e erkiteken kesalahenku? Sebab maun la kita sedar situhuna kita nge si erbahanca makana lit masalah, persoalen, perbeben, entah pe kiniseran si ialami kita. Adi e si terjadi, sidungi masalah e alu mehuli. Ula sempat masalah e reh mbelinna ras la erkedungen (bdk. Ερ. 4:26).

Tapi adi masalah, persoalen, perbeben, entah pe kiniseran si ialami kita e labo erkiteken kesalahenta, usihlah Jop. Adi siterusken turi-turin Jop enda ku ayat-ayat berikutna, respon Jop e luar biasa akap kami. I bas bindu 2:10 ituriken aminna gia Jop lit i bas kiniseran si mesangat, la lit ibelaskenna cakap si la mehuli kerna Dibata. Sebab tek Jop maka Dibata si isembahna e me Dibata si adil ras mediate, labo ipediat Dibata anak-anak si ikelengiNa lalap lit i bas kiniseran, apai ka kiniseran e labo erkiteken kesalahena. Lit paksana pagi ipulahi Dibata Jop i bas kiniseranna nari. I bas pendungi turi-turin Jop enda, iulihken Dibata kerina bagi siperlebe, banci sioge i bas bindu 40:12-17. Tuhu-tuhu indah pada waktunya!

PA-nta sendah ngajuk kita kerina Saitun gelah ngaloken alu ukur mehuli ras megenggeng kerina masalah, persoalen, perbeben, entah pe kiniseran si inanami. Sikelola alu mehuli gelah banci reh gegehna kinitekenta. Reh belinna kita i bas erkiniteken man Yesus Kristus. Ertina adi lit kita i bas situasi entah pe kondisi si bage rupa, katakenlah bujur man Dibata erkiteken ipelepas Dibata kita ngenanami erbage-bage perbeben, sebab iteh Dibata kengasupenta i bas ngalaken perbebenta (bdk. 1 Kor. 10:13).

Emaka marilah kita ersura sura guna ngalaken masalah, persoalen, perbeben entah pe kiniseran si nderpa kita alu mehuli. Mari siusih Jop i bas ia ngalaken kiniseran si ialamina, alu tetap ia paguh erkiniteken man Dibata janah la isalahkenna Dibata i bas perbeben si inanamina. Melala perbebenta i bas kecibal saitun enggo cawir metua: perbeben erkiteken kecibal kula ras tendinta, perbeben i bas berkomunikasi, perbeben i bas relasinta ras anak bage pe kempu, ras melala denga si debanna. Tapi tek kita adi paguh kita erpengedes man Dibata, ipengasupNa kita ngalaken kerina perbeben si lit i bas kegeluhenta si tep-tep wari. Dibata si mpegegehi kita.

IV. PERTOTON

O Dibata ngataken bujur kami i bas kerina perbeben si ialami kami. Berekenlah pengertin si mbages i bas kami ndalanai wari-wari kegeluhen kami. Pengasup kami ngalaken kerina masalah, persoalen, perbeben, entah pe kiniseran si ialami kami, gelah reh paguhna kiniteken kami man baNdu, janah gelarNdu imuliaken i bas geluh kami. I bas gelar Yesus Kristus, amin!

V. DISKUSI

1. Turiken kai saja si biasa ilakokenndu adi lit masalah, persoalen, perbeben, entah pe kiniseran sinderpa kam?

2. Rikutken PA-ta sendah, turiken uga carana bandu ngalaken masalah, persoalen, perbeben, entah pe kiniseran alu mehuli?

VI. ENDE-ENDEN

1. KEE GBKP No. 3:1-2

2. KEE GBKP No. 181:1-2

4. KEE No. 450:1-

I tengah juma ku suan galuh

I suki juma ku suan tebu

Gia melala perbeben geluh

Keleng ate Tuhan si negu - negu

Pdt. Larena br. Sinuhadji