Dewasa Ngaloken Perbedaan Suku (Bahasa, Adat Istiadat)

BIMBINGAN PA SAITUN GBKP TAHUN 2025

TANGGAL, 21-27 SEPTEMBER 2025

Ogen   : Kej. 11:5-9

Indonesia:

11:5 Lalu turunlah TUHAN untuk melihat kota dan menara yang didirikan oleh anak-anak manusia itu, 

11:6 dan Ia berfirman: "Mereka ini satu bangsa dengan satu bahasa untuk semuanya. Ini barulah permulaan usaha mereka; mulai dari sekarang apapun juga yang mereka rencanakan, tidak ada yang tidak akan dapat terlaksana. 

11:7 Baiklah Kita turun dan mengacaubalaukan di sana bahasa mereka, sehingga mereka tidak mengerti lagi bahasa masing-masing." 

11:8 Demikianlah mereka diserakkan TUHAN dari situ ke seluruh bumi, dan mereka berhenti mendirikan kota itu. 

11:9 Itulah sebabnya sampai sekarang nama kota itu disebut Babel, karena di situlah dikacaubalaukan TUHAN bahasa seluruh bumi dan dari situlah mereka diserakkan TUHAN ke seluruh bumi.

Karo:

11:5 Emaka nusur TUHAN ngenen kota ras menara si nggo ipajekken kalak enda. 

11:6 Nina TUHAN, "Genduari kalak enda sada bangsa ras sada cakap; enda me bena-bena ibas kerina pendahinna. Lanai ndekahsa uga pe beluh ia erbahan kai pe atena! 

11:7 Ota nusur Kita, sipecah cakapna jadi melala gelah lanai ia siangkan sapih-sapih ia." 

11:8 Emaka ikerapken TUHAN kalak ndai ku belang-belang doni enda. Kenca bage lanai iteruskenna majekken kota e. 

11:9 Eme sabapna maka kota ndai igelari Babil, erkiteken TUHAN nggo nggawer manusia, janah i jenari me TUHAN ngkerapken manusia ku belang-belang doni enda.

Thema  : Kerina Suku bangsa bas Dibata nari reh na.

Tujunna:

Gelah Saitun:

1. Ngaloken maka ibas lit na erbage-bage suku si idah kinibelinen Dibata.

2. Ngidah kiniulin bahasa budaya adat, suku sideban.

Metode: Studi Kasus

I. BENA KATA

Ija pe kita tading gundari, ikuta ntah ikota ntah i Tanah Karo gia, banci jadi enggo me lit suku sideban silabo seri ras kita jadi tetangganta, ntah jadi temanta sada aron bas pendahin, bagepe mungkin jadi keluarganta erkiteken ia erjabu ras sangkep geluhta. Kiniersadan ras suku sideban la terambati kita. Bas kecibal sie turah ukurta erbanding banding, mawen engteng siakap perbahanenna tapi megati ka pandangen siakap erkiteken la kita siangkan. Bas PA nta sekalenda sipepayo Kata Dibata kerna Suku Bangsa idoni enda gelah teneng tendinta, malem pusuhta amin pe kita nggeluh ras, ras raduken suku sideban.

II. MPEBAGESI OGEN

Pengertin Suku Bangsa

Suku bangsa eme sada kelompok manusia siersada erpalasken garis keturunan siniakap seri, janah nggeluh bas sada ingan, sada cakapna ntah seri pengeranana mungkin seri ka agamana jenari seri orat geluhna siteptep wari. Bageme ia ersada bas sada terpuk sinigelari sada suku. Dikune lit simenamseri ntah la seri ntah pe mesangat bedana, eme cinirangken ia bas sada suku e nari, sinigelari suku sideban. Cesaksin Pustaka Sibadia.

Guna ngantusi keçibal Suku Bangsa idoni enda, tentuna la terlepas bas kesaksin Pustaka Sibadia nari. Manusia sipemena lit erkiteken ijadiken Dibata. Emaka ljadiken Dibata, manusia sisentudu ras tempasna Dilaki Diberu ijadikenNa (Kej. 1:27). Ipasu-pasu Dibata manusia ndai gelah ertuah jadi enterem demi doni enda dingen taluken isina. Kuasai kerina nurung, perik perik iawang awang bagepe kerina rubia rubla idaraten (Kej. 1:28). Padan ras pasu-pasu sinialoken Adam ras Hawa me bena banana sejarah kerna manusia ras lit na erbage bage suku idoni enda. Arah kesusuren Adam tersinget me si Nuh anak Lameh, tupung umur Nuh 500 Tahun enggo ipupusna telu anak dilaki eme Sem, Ham ras Japet (Kej. 5:28-32). Bas bahan PA nta enda Kej 11:5-9 teridah Dibata tetap mperdiateken manusia.

Bas Ayat 5-6: "Dibata ngenen menara siipajekken kalak enda, bagepe ipepayo Dibata kiniersadanna nggeluh bas sada ingan ras sada cakapna ras i idah Dibata pe kepentaren manusia e, singasup erbahan kai pe guna pertahanken kiniersadanna gelah ia terberita. Idah Dibata pe sura-sura manusia e nggo mampa bas sura-suraNa nari (bdk.Kej.1:28).

Ayat 7-8: "Teridah man banta sada perbahanen Dibata gelah manusia patuh man baNa, ipecahna cakap manusia ndai jadi melala emaka lanai ia siangkan sapih-sapih ia. Kasa kalak sisiangkan cakap me erterpuk-terpuk berkat merap ku belang-belang doni enda.

Ayat 9: "Kuta Babel jadi peringet-ingeten jadi tanda Dibata nggo mecah cakap manusia, arah eme turah suku bangsa ras adat istiadatna.

Kesaksin Pustaka Sibadia ngataken maka kerna suku bangsa silit idoni enda eme rehna bas kesusuren si Nuh, sebab tupung keleng lengen doni enda ia nari nge ngenca singgeluh ras anak-anakna (Kej. 10:32)

Kinata kecibal suku bangsa idoni enda, tentu lit nge bena-benana (sejarahna). Ahli-ahli sejarah mpelajari uga jadina doni enda ras lit na manusia rikut ras perkembangenna maka enggo jadi sada bangsa jadi sada Negara, seh bagi si idah ras nanami kita rikut kecibal sukunta ras inganta tading bagidie. Pendapat ahli sejarah alu idukung bukti bukti si terteki, enggo me siakap payo tapi banci jadi lit ka pendapat si berbeda bas ahli sideban nari, kerina lit perpayona menuju kesempurnaan, saja ola kita lupa,

kita manusia lit bas keterbatasen ta, Dibata ngenca ngantusisa sebab IA simada kuasa sinjadiken kerina sinasa lit, ras IA singasuhisa, ras IA ka singembangkensa bagi peratenNa

III. PENGKEΝΑΙΝΑ

Gerejanta ngarapken gelah kita Saitun dewasa ngaloken perbedan suku Sialoken ras siergai bagi tema PA nta sekali enda. Kerina suku bangsa idoni enda rehna bas Dibata nari. Bas kerina suku bangsa, lit je karya Dibata Emaka sipelajari kiniulin suku sideban si la seri bagi sukunta, bagepe tetap sijaga kiniulin karya Tuhan bas suku nta, sijaga gelah tetap mehull janah sikembangken rikutken pengajaren Pustaka Sibadia, eme jadi gegehta Undang-undangNa ngembari kita, sebab ras IA ngenca maka ngasup kita ngakuken ras ngaloken sinasa lit alu mehuli, bagi pengajuk per Masmur bas Masmur 122:4 nina "Kuje me reh kerina suku-suku Tuhan ngataken bujur man Tuhan sue ras siiperentahkenNa".

IV. PERTOTO

Ngataken bujur kami Tuhan ibas enggo bereken ndu kegeluhen man kami, ingan kami tading suku bangsa si nipergelarken man kami, bagepe ibrendu kami nggeluh ras suku-suku sideban. Pasu-pasuNdu kami kerina gelah ngasup ngaloken sada ras sidebanna, nggeluh kami radu ras-ras ngaloken, kami kerina bas kam nari rehna. Bas Tuhan Yesus kami ertoto man bandu. Amin....

V. STUDI KASUS

Lit me sada perjabun.

Sidilaki gelarna Pelalain Sembiring, ndeharana Ragamta Br Damanik. Sangap kel perjabunna ibas pemasu-masun Tuhan. Tubuh me anak na sintua, banna gelarna si BINE, tubuh ka anakna sipeduaken banna gelarna si NEKA, tubuh ka anak na sipeteluken ban na gelar na si TUNGGALI, emaka tubuh ka anakna sipeempatken ban na gelar na si GALIKA. Keluarga enda eme keluarga simalang man Tuhan, rajin beribadah ras aktif bas kegiaten gereja. Kenca seh kerina sekolah anak-anakna, janah pe enggo lit pendahinna, emaka jumpa me jodohna. Si BINE erjabu ku Sulawesi Utara, ibuatna kalak Manado, erjabu ka si NEKA ku Bandung buatna kalak Sunda, erjabu ka si TUNGGALI ku Samarinda ibuatna kalak Dayak, emaka erjabu ka si GALIKA ku Jaya Pura buatna kalak Papua.

Keluarga enda gundari enggo lima jabu nina kalak, ah me keluarga si harmonis, si sampat sampaten ia, saling mendukung, nggit ka ia nampati kalak sideban pe. Bas rumah na lit foto keluarga alu erpaken adat Karo, Simalungun, Manado, Sunda, Dayak ras Papua.

POKOK DISKUSI

1. Engkai maka banci bagenda ulina kegeluhen keluarga enda?

2. Kai nge kira-kira motto keluarga enda? (Persada-sada gelar empat kalak anak dilaki bas keluarga enda)

VI. ENDE-ENDEN

1. KEE GBKP No. 3:1-3

2. KEE GBKP No. 47: 1,2

3. KEE GBKP No. 354: 1-3

4. KEE GBKP No. 480: 1

Pdt. Satria Sembiring