BBIMBINGEN PA MAMRE TANGGAL, 05 OKTOBER - 11 OKTOBER 2025

Dahinku Eme Pelayanenku

Teks : Johanes 5 : 10 - 17

10 Emaka nina kalak Jahudi si erkuasa man kalak si nggo malem e, "Wari Sabat kap sekalenda. Rikutken Undang-undangta la banci ibabandu amakndu e."

11 Ngaloi ia, "Nina kalak si nggo pepalem aku ndai, 'Angkat amakndu jenari dalanken.'"

12 Jenari nungkun kalak Jahudi e, "Ise kin si nuruh kam e?"

13 Tapi la itandai kalak si nggo malem e ise si mpepalem ia, sabap nterem kal i je jelma, janah Jesus nggo lawes arah tengah jelma si nterem e.

14 La ndekahsa kenca si e, jumpa Jesus ras ia i Rumah Pertoton. Nina Jesus man bana, "Genduari kam nggo malem; olanai bahan si la ngena ate Dibata, gelah ola jadi man bandu keleken asa si nggona."

15 Jenari lawes kalak si nggo malem e, iberitakenna man penguasa-penguasa kalak Jahudi maka Jesus kap si mpepalem ia.

16 Perbahan si e idarami kalak Jahudi e dalan guna niksa Jesus, sabap ipepalem Jesus kalak si penakiten i bas wari Sabat.

17 Tapi nina Jesus man kalak Jahudi e, "BapangKu erdahin kap lalap; emaka Aku pe arus erdahin."

Yohanes 5 : 10 - 17

10 Karena itu orang-orang Yahudi berkata kepada orang yang baru sembuh itu: "Hari ini hari Sabat dan tidak boleh engkau memikul tilammu." 

11 Akan tetapi ia menjawab mereka: "Orang yang telah menyembuhkan aku, dia yang mengatakan kepadaku: Angkatlah tilammu dan berjalanlah."

12 Mereka bertanya kepadanya: "Siapakah orang itu yang berkata kepadamu: Angkatlah tilammu dan berjalanlah?"

13 Tetapi orang yang baru sembuh itu tidak tahu siapa orang itu, sebab Yesus telah menghilang ke tengah-tengah orang banyak di tempat itu.

14 Kemudian Yesus bertemu dengan dia dalam Bait Allah lalu berkata kepadanya: "Engkau telah sembuh; jangan berbuat dosa lagi, supaya padamu jangan terjadi yang lebih buruk."

15 Orang itu keluar, lalu menceriterakan kepada orang-orang Yahudi, bahwa Yesuslah yang telah menyembuhkan dia.

16 Dan karena itu orang-orang Yahudi berusaha menganiaya Yesus, karena Ia melakukan hal-hal itu pada hari Sabat.

17 Tetapi Ia berkata kepada mereka: "Bapa-Ku bekerja sampai sekarang, maka Akupun bekerja juga." 

Tujuan : Gelah Mamre :

1. Ngasup njadiken pendahinna selaku bentuk pelayanen man Dibata
2. Ngasup jadi pasu-pasu arah pendahin

I. KATA PENARUH

Ibas jaman modern gundari enda megati kalak mbedaken istilah melayani bagepe ras pendahin. Adi kita erdahin ibas lembaga rohani ikataken e melayani. Tapi adi kita erdahin ibas ingan sekuler emaka e labo ikataken melayani melainkan erdahin. Enda pemahaman si sangat sempit lako ngantusi erti ngelai bagepe ras erdahin. Si jadi penungkunen man banta kerina: uga kita ngidah pendahin e labo terjeng pendahin guna kepentingenta ngenca tapi lebih asa si e pendahin e eme sada pasu-pasu siibereken Dibata man banta gelah arah pendahinta kita pe banci jadi pasu-pasu man kalak sideban si lit i sekelewetta? Arah bahan PA Mamre nta enda, ibabai kita gelah meteh maka pendahin e eme pelayanen siilakoken kita guna kemulian gelar Tuhan simabai kita banci jadi pasu-pasu arah pendahinta.

II. URAIAN TEKS

Arah kata Dibata si seh man banta erpalasken Johanes 5:10-17 enda ngerana kerna kejadin Jesus mpepalem kalak si pinakiten i kolam Betesda ibas wari Sabat. Kenca kejadin e lit kalak Jahudi si erkuasa nungkun man kalak si enggo ipepelem Jesus ndai kerna Undang-undang singerana bahw ibas wari Sabat la banci erdahin. Idarami Kalak Jahudi ndai ise sinuruh kalak si enggo malem ndai ise sinuruh ia erdahin (ngangkat amakna), janah kenca ietehna ise sinuruh ndahiken dahin e, emaka idarami kalak Jahudi ndai dalan guna ngukum Jesus erkiteken enggo IA erdahin ibas wari Sabat, si notabene e wari si penting nandangi kalak Jahudi ibas undang-undangna. Tapi menarik jabapen Jesus nandangi kalak Jahudi ndai bagi sitersurat ibas ayat 17 nina "Bapangku erdahin kap lalap, emaka Aku pe arus erdahin." Arah pernyataan enda teridah piga-piga hal si jadi poin penting ibas Jesus ngajarken pengertin erdahin man kalak Jahudi. Sipemena eme tetap nge ganjangen Hukum Dibata asangken Hukum Taurat. Sipeduaken eme uga maka pendahin siilakoken Jesus e labo terjeng sekedar pendahin biasa tapi epe bagin bas pelayanen si arus ilakoken katawari paksa pe. Jesus pe nekanken maka pendahin eme pemere Dibata man manusia erkiteken Dibata pe la ngadi ibas erdahin.

III. PENGKENAINA

Arah pemahaman maka pendahin eme pemere Dibata man banta maka lit piga-piga hal si penting jadi perenungenta ibas PA Mamre nta enda eme:

1. Pendahin e Pasu-pasu labo Beban Dibata erdahin kap lalap, simabai kita memaknai maka selaku manusia kai pe pendahinta ula min siakap e mbebani dirinta tapi jadikenlah e jadi jati diri selaku kalak sierkiniteken seh maka kai pe pendahinta banci sidahiken alu ukur meriah ras ngasup kita menikmatisa dingen ulihna pe pasti mehuli. Janah tetap siinget kalak si erdahin pasti tetap ikawali Dibata ibas pendahinna
2. Dahinku eme Pelayanenku Enda me si jadi tema ibas PA Mamre nta enda. Ibas kita erdahin palasna eme guna ndalanken sura-sura Dibata simahanca ngasup kita fokus ku proses pendahin labo ku hasilna. Dibatanta eme Dibata si mencintai proses emaka kita pe arus ndalanken dahinta alu ertutus ate amin gia mungkin hasilna la bagi ukur tapi tetap sidahiken alu ukur meriah. Alu bage dahinku eme pelayanenku mereken pengertin man banta maka erdahin e labo ibatasi ruang dan waktu (sekedar ngikuti aturan) tapi lit palas kekelengen man simereken dahin eme Dibata. Janah pertanggungjabapenta ibas kita ndahiken dahin e labo man manusia tapi man Dibata.

3. Arah Pendahin, kita banci jadi pasu-pasu Nggejapken maka pendahin e pemere Dibata, enda mabai kita njadiken pendahinta jadi dalan guna banci jadi pasu-pasu man sekelewetta. Labo terjeng arah hasil sinialoken kita ngenca banci mabai kita jadi pasu-pasu, tapi arah proses kita erdahin pe malem ate kalak natap pendahinta sienggo jadi pasu-pasu man bana. Marilah kita Mamre GBKP banci njadiken pendahinta jadi bagin bas caranta ngelai Tuhan seh maka arah pendahinta sekalak-sekalak banci kita jadi pasu-pasu man sekelewetta janah sue ras motto nta Mamre GBKP banci kita jadi Mamre si erdiate ras Mamre si erpemere. Dibata si masu-masu kita kerina.

IV. DISKUSI

1. Oge Mulihi Johanes 5:17, uga nge pengangkanta kerna ayat enda?
2. Kai nge ulihna ibas kita njadiken pendahinta jadi bagin pelayanenta man Dibata? Ibas pengalamenndu ndahiken pendahin si teptep wari, nggo nge teridah ije pelayanen man Dibata?

Usulen Lagu

1. KEE GBKP No 255:1,2
2. KEE GBKP No 68:1,2
3. KEE GBKP No 249:1,3
4. KEE GBKP No 343:1- (persembahen)

Pdt. A. Bayu. B. Tarigan, S.Th.