BIMBINGAN PA MAMRE TANGGAL, 22 FEBRUARI – 28 FEBRUARI 2026

erlangkah Keluarga Dibata

Ogen : 1 Timotius 3:14-16

14 Asum kubahan surat enda man bandu, ngarap aku maka la nai ndekah sa reh aku ndahi kam.

15 Tapi adi ndekah denga maka aku reh, surat enda me mpebetehkenca man bandu kuga arusna perlangkahta i bas keluarga Dibata, perpulungen Dibata si nggeluh, binangun dingen palas ajaren si tuhu-tuhu.

16 Ise pe la ngasup nimbaksa kerna belinna rahasia agamanta. "Jesus Kristus reh i bas rupa manusia, ipetangkas Kesah Dibata Ia la ersalah, janah teridah man malekat-malekat. Kerna Ia ipembar ku kerina bangsa-bangsa, kerina manusia i doni tek man BaNa, janah Ia nggo iangkat Dibata ku Surga."

1 Timotius 3:14-16

14 Semuanya itu kutuliskan kepadamu, walaupun kuharap segera dapat mengunjungi engkau.

15 Jadi jika aku terlambat, sudahlah engkau tahu bagaimana orang harus hidup sebagai keluarga Allah, yakni jemaat dari Allah yang hidup, tiang penopang dan dasar kebenaran.

16 Dan sesungguhnya agunglah rahasia ibadah kita: "Dia, yang telah menyatakan diri-Nya dalam rupa manusia, dibenarkan dalam Roh; yang menampakkan diri-Nya kepada malaikat-malaikat, diberitakan di antara bangsa-bangsa yang tidak mengenal Allah; yang dipercayai di dalam dunia, diangkat dalam kemuliaan."

Gelah Mamre :

1. Meteh kai makna Keluarga Dibata
2. Mpeturah biak anggota keluarga Dibata

I. KATA PENARUH

Surat 2 Timotius eme surat si perpudina ikirimken Rasul Paulus kempak Timotius. Tupung Paulus nulisken surat enda sura-surana mpengadi perkembangen kekristenen i Roma bagepe i bas kerina daerah jajahenna alu mpeturah ate mesui kempak kalak Kristen, termasuk Paulus pe jadi tahanan negara i Roma (2 Tim. 1:16). Paulus nggeluh i bas kekurangen sebage sekalak penjahat (2 Tim. 2:9), itadingken enterem teman-temanna (2 Tim. 1:15) dingen ia pe sedar maka pelayanenna nandangi erkedungen bagepe kematenna enggo ndeher (2 Tim. 4:6-8;18).

Tujun Paulus nulisken surat enda kempak Timotius selaku anak si ikelengina (2 Tim. 1:2) dingen temanna erdahin si setia (bd. Rm. 16:21) e me segelah Timotius si nguda denga bagepe lit biak permela i bas ia banci pang dingen paguh ngalaken kiniseran. Paulus sedar maka kiniseran si mesangat banci reh ngkenai Timotius si reh arah darat perpulungen nari khususna pemerintahen Romawi bagepe reh arah guru-guru palsu itengah-tengah perpulungen. Paulus nehken nasihat kempak Timotius segelah tetap nggelem pengajaren Berita si Meriah, Berita si Meriah aminna gia i tengah-tengah kiniseran ras perlawanen kalak. Alu bage selaku pengepkep perpulungen i kuta Epesus, Timotius ngasup ngepkep perpulungen selaku anggota keluarga Dibata alu mehuli guna mpeteguhi kiniteken perpulungen.

II. URAIAN TEKS

Judul Kitab 1 Timotius 3:14-16 enda eme: “Rahasia si Mbelin”. Kerna rahasia si mbelin isuratken i bas 1 Timotius 3:16: "Jesus Kristus reh i bas rupa manusia, ipetangkas Kesah Dibata Ia la ersalah, janah teridah man malekat-malekat”. Jadi rahasia si mbelin e me Jesus Kristus. Ikataken rahasia si mbelin erkiteken ise pe manusia la meteh kerna perbahanen Dibata nuruh anakNa si tonggal reh ku doni enda jadi Juru Selamat kempak manusia. Manusia la meteh kerna paksa kerehenNa. Pelin-pelin perbahanen Dibata. Ia tuhu-tuhu la ersalah erkiteken Ia e me Dibata. Teridah man malekat-malekat erkiteken Ia ras tading i bas sada ingan e me surga. Malekat e me utusen (persuruhen) Dibata. Jadi malekat e me si ngelai Dibata i surga bagepe megati jadi persuruhen isuruh Dibata malaikat Gabriel njumpai Maria nuriken kerna ketubuhen Jesus Kristus (Luk. 1:26-38). Kerna Jesus Kristus me tetap ipembarken guna keselamaten manusia (bd. Mat. 28:18-20; Mrk. 16:15-16). Kenca Ia reh ku doni enda maka Ia enggo iangkat ku surga (bd. Perb. 1:6-11). E maka i bas paksaNa, reh denga pagi Ia mulihken ku doni enda ngeranaken si nggeluh ras si nggo mate (bd. Joh. 14:2).

I bas 1 Timotius 3:14, Rasul Paulus nuriken kempak Timotius maka tupung ia erbahan surat man bana maka erpengarapen Paulus ndahi ia (Kemungkinan tupung Paulus nulisken surat 1 Timotius si ialamatken kempak Timotius maka ia paksa ringan i Makedoni sekitar tahun 64–65 M. Tupung e ia mbaru ipulahi arah tahanen i Roma dingen paksa ngelakoken perdalanen missi. Itadingkenna Timotius ngelai i Epesus, jenari ikirimkenna surat nehken persinget kempak Timotius arah Makedoni nari). Selaku bapa rohani, tentu saja i bas kiningudan Timotius, rutang iakap Paulus lako tetap mpersingeti dingen mpegegehi ia.

I bas ayat 14, Paulus nuriken maka adi ndekah denga ia reh erkiteken mbelang si man siaren lako nehken Berita si Meriah i bas surat ia nehken persinget kempak Timotius. E maka i bas suratna isehkenna kearusen nggeluh keluarga Dibata, perpulungen Dibata si nggeluh, binangun dingen palas ajaren si tuhu-tuhu. Kerna si enda ituriken Rasul Paulus i bas

1 Timotius pasal 4-6. Kerna kearusen nggeluh i bas keluarga Dibata isuratken Paulus i bas 1 Timotius 5:1-6:2a. Kerna perpulungen Dibata si nggeluh isuratken Paulus i bas 1 Timotius 4:6-16; 6:11-21. Kerna perpulungen Dibata si nggeluh si nimaksudken Paulus e me perpulungen si megegeh i bas pertendin, ngasup jadi usihen subuk i bas pengerana, i bas lagu langkah, i bas nehken keleng ate, i bas kiniteken bage pe i bas ukur bujur, la nia-niaken pemere Dibata, ngasup njaga diri ras pengajaren, ndalanken si ngena ate Dibata, tutus ersembah man baNa, tetap ernalem ku Ia, cidahken keleng ate, megenggeng dingen lemah lembut. E maka sinikataken perpulungen Dibata si nggeluh e me perpulungen si ersada ras Dibata dingen ngasup naksiken Berita si Meriah arah kerina dampar kegeluhen. Janah kerna binangun dingen palas ajaren si tuhu-tuhu isuratken Paulus i bas 1 Timotius 6:2b-10.

III. PENGKENAINA

Keluarga e me bagin si kitikna i tengah-tengah masyarakat si anggotana nggeluh ersada ras i bas sada jabu si erkawiten erkiteken dareh, perjabun ntah adopsi. Keluarga erguna sebage ingan guna sosialisasi, perlindungan, dingen pengembangen emosional, mental, bagepe fisik kerina anggotana. Rikutken Tata Gereja GBKP Pasal 16, isingetken maka keluarga e me:

1. Keluarga Kristen e me lembaga si ibangun ibas karya Dibata.
2. Keluarga e me kiniersadan nggeluh bapa, nande ras anak si ibahan Dibata lako ndahiken rencana Dibata itengah-tengah keluarga. Pengertin enda lit erpalasken visi GBKP e me: GBKP menjadi keluarga Allah yang diutus mengerjakan misi Allah di dunia bagi seluruh ciptaan (Mrk. 16:15; 1 Pet. 2:9-10). Rikutken pengertin enda maka kiniersadan keluarga arus enteguh dingen tujun geluhna pe arus seri e me guna kedamen jabu bagepe guna kemulian si mpersadaken anggota jabu e me Dibata alu ngekelengi kerina tinepa Dibata. Alu bage keluarga arus mbangun kinitekenna segelah kiniersadanna nteguh sapih-sapih anggota jabu bagepe ras Tuhan Dibata. I bas Pustaka si Badia lit sidatken kerna pengalaman perjumpan ras Tuhan si mbangun kiniteken keluarga. Keluarga Abraham jadi salah sada contoh. Konsep keluarga pe lit i bas kegeluhen perpulungen si pemena i Jerusalem. I bas Perbahanen Rasul-rasul 2:43-47 si datken sifat keluarga si kin pe jadi ciri gereja. Si pemena e me litna mujizat. Mujizat e me perubahen suasana. Suasana ceda ate arus iubahken jadi keriahen ukur. Sipedua-ken e me erbagi. I bas kecibal kegeluhen termasuk erbagi erta. Bagem tentuna pe min si jadi bas gereja, kerinana anggotana banci erbagi i bas keriahen bagepe ceda ate. Sipetelu-ken e me disiplin rohani. I bas perpulungen si pemena ilakoken ngikuti konsep kiniteken kalak Jahudi e me kebaktin 6 kali tep-tepwari. Iarapken perpulungen GBKP jadi keluarga si disiplin. Disiplin i bas radu ras mbangun kiniteken, disiplin mbangun komunitas gereja si erpalasken kekerabaten.

Gereja sebage keluarga teridah pe i bas perbahanen ngaloken kerina anggota keluarga. GBKP sebage keluarga lit i bas erbage suku, tingkat pendidikan, tingkat penghasilen ras sidebanna. Sebage keluarga kerina anggota arusna banci ialoken alu mehuli. Seterusna GBKP sebage keluarga anggotana e me benaken arah danak-danak nari seh saitun, kalak si terpinggirken, disabilitas ras sidebanna. Sebage keluarga GBKP arus terbuka dingen jadi ingan aman kempak kerina anggota keluarga.

Tema PA Mamre GBKP i bas paksa enda e me: perlangkah keluarga Dibata. Rikutken teks PA Mamre 1 Timotius 3:14-16 bagepe isi Tata Gereja GBKP ras GBP (Garis-garis Besar Pelayanen) GBKP si jadi orat perlangkah keluarga Dibata e me:

1. Nggeluh i bas kebenaren Kata Dibata.

     2. Mehamat kempak kalak sideban.

     3. Njaga diri gelah tetap bersih.

4. Ngelai alu mehuli.

5. Ndalanken si mehuli dingen ngasup ngubah si la mehuli jadi mehuli.

6. Ngasup erbagi kiniliten ras teman manusia si kekurangen.

    7. Disiplin i bas erdahin ras kebaktin.

Segelah perlangkah keluarga Dibata enda banci jadi i bas kerina mamre GBKP tentuna perlu kal mamre tetap njaga relasi ras Tuhan. Mamre GBKP nandai Dibata si isembahna gelah jadi kinata maka Mamre GBKP tuhu-tuhu enggo jadi abdi Dibata.

IV. DISKUSI

1. Oge mulihi 1 Timotius 3:15. Turiken kai erti keluarga Dibata.
2. Turiken biak-biak si perlu lit i bas anggota keluarga Dibata.

USULAN ENDE-ENDEN :

1. KEE GBKP No. 2:1,2
2. KEE GBKP No. 21:1,2
3. KEE GBKP No. 19:1,3
4. KEE GBKP No. 385:1 (Persembahen)

Pdt. Christoper Sinulingga, M.Th.