Kesehaten Tendi

BIMBINGAN PA SAITUN GBKP TAHUN 2026

TANGGAL, 02-08 Agustus 2026

Ogen : 3 Johanes 1:2-4

Salam

Indonesia:

[2] Saudaraku yang kekasih, aku berdoa, semoga engkau baik-baik dan sehat-sehat saja dalam segala sesuatu, sama seperti jiwamu baik-baik saja.

[3] Sebab aku sangat bersukacita, ketika beberapa saudara datang dan memberi kesaksian tentang hidupmu dalam kebenaran, sebab memang engkau hidup dalam kebenaran.

[4] Bagiku tidak ada sukacita yang lebih besar dari pada mendengar, bahwa anak-anakku hidup dalam kebenaran.

Karo:

[2] O temanku si kukelengi, ertoto aku gelah kai si mehuli jadilah man bandu, janah mejuah-juahlah bagi kueteh maka kegeluhen pertendinndu pe mehuli.

[3] Meriah kal kuakap kenca reh piga-piga kalak seninanta kalak Kristen, janah nuriken man bangku kuga bujurna kam bagi biasana pe kam nggeluh i bas kebujuren nge.

[4] La lit si banci erbahanca ukurku teriahen asangken megi anak-anakku nggeluh i bas kebujuren.

Tema: Sehat Pertendin

Tujunna:

Gelah Saitun:

1. Meteh alu payo kuga kawiten kebujuren ras kesehaten pertendin

2. Tetap njaga pertendinna kesehaten

Metode: Diskusi

I. BENA KATA

Kesehaten kula seri pentingna ras kesehaten pertendin. Erbage-bage cara iusaheken gelah banci sehat kulanta, e me arah njaga pola makan, istirahat cukup, olah raga ras sidebanna. Tapi jarang kal kita ngukuri kuga gelah sehat pertendinta. Erbage-bage persoalen sinihadapi kita erbahanca terganggu pikirenta seh maka pertendinta pe la nyaman jenari la dat kita kedamen bage pe keriahen. Adi la sehat pertendin, emosi pe la terkontrol, murah merawa, depresi, egois, rukur negatif janah pendendam. Jadi sehat pertendin cukup perlu kal man banta, sebab tendi e merupaken bagin penting nandangi kesehaten. Tendi si la sehat mpengaruhi kualitas geluhta.

II. MPEGESI OGEN

Ogenta enda eme kata salam ras toto sini peseh Rasul Johanes man Gayus. Isi pesan ras totona e me kuga pentingna njaga kesehaten kula bage pe pertendin. I bas suratna man Gayus, Johanes notoken gelah jadilah simehuli man bana, nggeluh i bas mejuah-juah terlebih-lebih kegeluhen pertendin. Tambah keriahen Johanes arah berita sini peseh arah piga-piga kalak Kristen, kerna cara nggeluh Gayus si tetap i bas kebujuren. Enda me situhuna si jadi palas kegeluhen selaku kalak Kristen. Gelah sehat pertendin kuncina e me nggeluh i bas kebujuren si mabai ia ku bas dalan dame sejahtera. Amin pe melala tantangen si man alankenna, banci enggo kote tapi erkiteken geluhna tetap i bas kebujuren Dibata maka ialokenna me gegeh ras penampat i bas Dibata nari sierbahanca ia ngasup mentasi kerina perbeben geluh. Bagi nina permasmur: Engkai maka ndele ateku? Engkai maka susah kuakap? Ku Dibata saja aku erpengarapen, jenari kupuji IA tole, Si Engkelini aku dingen penampatku (Mas. 43:5). Kalak si tetap ngarap man Tuhan, tutus ndalanken pedahNa dingen nggeluh i bas kebujuren maka pertendinna tetap terjaga (sehat).

Nggeluh i bas kebujuren seri ertina ras erdalan i bas kebujuren. Kata enda nuduhken maka kiniteken si nggeluh (aktif) ras tangkas teridah i bas kegeluhen Gayus. Buah kinitekenna tangkas isaksiken piga-piga kalak Kristen paksa sie janah mpeturah keriahen ukur pertua (ay. 4)

III. PENGKENAINA

Perbahanen manusia la terlepas i bas kai si lit i bas ukurna. Adi i bas ukur lit si la payo maka mpeturah aru ate, mbiar, egois ras si debanna. Tapi adi i bas ukur lit si mehuli tentuna teridah arah perbahanen erbage-bage si mehuli sierbahanca tetap ukur, la lit kearun ate. Gia melala si banci mpengaruhi perukurenta tapi labo lit sinentuken ukurta selain dirinta jine. E maka perlu kal kita njaga perukurenta gelah tetap sehat ras dewasa. Dibata ersura-sura gelah tetap sehat pertendinta. I bas Pilipi 4: 6-8 mpersingeti kita gelah ula lit kearun ate alu tetap mpeseh toto man baNa kerna kerina keperlun geluhta janah tetap ngataken bujur i bas kerina kecibal geluhta. Sehat pertendinta enda mbelin kawitenna ras kiniersadan ras Dibata. Sabab si banci mpengaruhi kesehaten pertendinta eme kinilangasupen ngaloken dirinta uga litna. Dibata jine enggo nikapken erbage-bage si mehull guna kegeluhenta. Sabab IA enggo erpadan lako nemani kita seh pe kedungen doni enda (bd. Mat. 28: 20b). Genduari kita nggeluh i bas sada situasi si dem kearun ate, pengarapenta gelah lit min ketenangen (sehat pertendin). Kegeluhen enda terus erdalan, kerinana erpaksa-paksa, erbage-bage tantangen ras keriahen ngekenai kita. E maka nggeluh ras erdalanlah i bas kebujuren dingen tetaplah erkeleng ate.

Bagi Johanes ncibalken dirina sebagai orang tua emaka marilah kita tetap mereken persinget ras mereken usihen nandangi anak ras kempu gelah termulia gelar Dibata. Lit kalak si ngaku Kristen, tapi labo nggeluh i bas kebujuren ras kekelengen. Ingetlah Dibata labo terjeng ngarapken pengakun tapi teridah arah perbahanen. (Mat.7:21)

IV. PERTOTON

O Tuhan Dibata sampatilah kami gelah ngasup nggeluh i bas kebujurenNdu guna ngukuri kerina si mehuli jenari la aru ate kami kerna kegeluhen kami. Sehat pertendin dingen erguna man jabu, sangkep geluh, gereja ras sekelewet kami. Jenari kemalemen ate si rehna i bas Dibata nari si la terukuri kami, ngarak-ngarak pusuh ras ukur kami erkiteken persadan kami ras Kristus Jesus. Amin

V. DISKUSI

1. Kai si erbahanca maka Gayus ngasup nggeluh i bas kebujuren?

2. Kai ka si banci silakoken gelah banci terjaga kesehaten tendinta! Turiken dingen lakokenlah!

VI . USULEN LAGU

1. KEE GBKP No.323: 1-2

2. KEE GBKP No.381:1-2

3. KEE GBKP No.202:1.2

Pdt. Kasir Purba, STh