Kesehaten Roh/Kesah

BIMBINGAN PA SAITUN GBKP TAHUN 2026

TANGGAL, 09-15 Agustus 2026

Ogen : Lukas 4: 18-19

Jesus la ialoken i Nasaret

Indonesia:

[18]  ”Roh Tuhan ada pada-Ku, oleh sebab Ia telah mengurapi Aku, untuk menyampaikan kabar baik kepada orang-orang miskin; dan Ia telah mengutus Aku

[19] untuk memberitakan pembebasan kepada orang-orang tawanan, dan penglihatan bagi orang-orang buta, untuk membebaskan orang-orang yang tertindas, untuk memberitakan tahun rahmat Tuhan telah datang.”

Karo:

[18] “Kesah Tuhan lit i babongKu, sabap enggo ipilihNa Aku guna meritaken Berita Si Meriah man kalak si musil. IsuruhNa Aku erberita man kalak si tertaban maka ipulahi me ia, janah kalak si pentang erpengidah me, kalak si itindas ipulahi me.

[19] Janah mpebetehken masana Tuhan mulahi bangsaNa.”

Tema: Kesah Tuhan Gara Ibas Pusuhta

Tujunna:

Gelah Saitun:

1. Nggejapken maka Kesah si Badia me ulu gegehna i bas kai pe

2. Nuriken kengasupen i bas bidang kai saja ia banci muat bagin.

Metode: Diskusi ras Aksi

I. BENA KATA

Adi keluarga paksana i bas ceda ate, tempa-tempa embun mekapal nutupi pusuh ras perukurenna. La ietehna kai si arus ilakoken, kuga kerna peti, kuburenna, ndigan ban acarana ras pe kuga kerna undangen. I bas keadaan si bagenda me peran tetangga, perpulungen rikut pe ras teman meriah guna nehken pelayanen bage pe penampat gelah keluarga banci terapul dingen megegeh. I bas erbage-bage tantangen kegeluhen man alanken, megati kita kote, bene pengarapen, aru ate ras lanai tetap ukur. Ije me pentingna hadir gereja guna penahangi baban si mberat e. Jesus jine enggo mereken sada usihen i bas pelayanenNa subuk i Galilea seh pe ku Nasaret seh ku belang-belang daerah. Kerina enda jadi erkiteken Kesah Si Badia ngkuasai IA. Bage me kita maka arah penampat Kesah Si Badia sialoken erbage-bage pemere/talenta guna banci kita muat bagin mpenahangi baban geluh temanta. Kondisi kesehaten, ekonomi, umur bage pe fisikta la meneken semangat Saitun i bas ncidahken buah kinitekenta.

II. MPEGESI OGEN

Bahan PA nta wari si sendah erpalasken kitab Jesaya 61:1-2 sini buat Jesus i bas khotbahNa si pemena sangana IA bengket ku rumah pertoton i Nasaret. Enda me bena-benana pendahin Jesus nandangi jelma si enterem. Janah pendahin Jesus i bas paksa si e guna nehi kai si enggo inubuatken nabi ibas jaman Jesaya. Keadaan masyarakat i bas jaman Jesaya enda tuhu-tuhu menghawatirken. Kenca kalak Juda mulih i pembuangen nari mbue kiniseran si man alankenna. Kalak musil radu ras keluargana ngendesken dirina jadi budak janah ertana pe igadaiken guna nggalari utang. Lanai erdiate nandangi teman sebangsana, deba enggo ndarami dewa-dewa. I bas situasi si bagenda me Tuhan nuruh para nabi guna mpeseh berita keriahen kerna pembebasen (bhs. Ind. Tahun Rahmat Tuhan). Tahun pembebasen (Jobel) e me pembebasen i bas perbudaken nari janah taneh sini gadaiken mulihken jadi hak milik.

Janah ayat enda me sini ogeken Jesus i bas IA menaken pendahinNa i bas bahanta ndai e me Luk. 4: 18-19. Aminna pe ayat enda seri, e me kerna pembebasen nandangi kalak si tertindas ras tertaban, tapi pembebasen sini peseh Jesus i bas Lukas enda la saja pembebasen secara fisik bagi sini alami kalak i bas jaman Padan Si Ndekah, tapi pembebasen secara menyeluruh e me kesah, tendi ras daging. Alu kata si deban Jesus sangana mproklamirken maka IA e me Mesias (Si iminaki) guna meritaken Berita Si Meriah. I bas bahasa Indonesia lit tertulis; TUHAN telah mengurapi aku, kata mengurapi ertina namaken minak Saitun ku babo takalNa sebagai tanda maka IA enggo ipilih, ilantik ntah isuruh Dibata jadi imam ntah raja. Jadi arah kata enda ngataken maka Jesus enggo itetapken, iangkat, ilantik dingen itugasken Dibata guna mpeseh Berita Si Meriah man kalak musil, si tertaban, kalak pentang ras kalak si itindas sebagai tanda maka Tuhan mulahi bangsaNa.

III. PENGKENAINA

Arah bahan ogenta enda teridah lit ije pesan Tuhan sekaligus jadi visinta, maka kuga nabi i bas Padan Si Ndekah nehken berita pembebasen man bangsa Israel i bas perbudaken nari, jenari iterusken Jesus i bas Padan Si Mbaru e me kerna pembebasen manusia arah bahaya kuasa dosa, janah genduari seh ka man banta kita si enggo ngaloken pembebasen i bas Tuhan nari guna ipake jadi alat si efektif i bas mbebasken kalak si tertaban.

Piga-piga hal perlu si perdiateken e me :

1.    Kesah Tuhan gara i bas pusuhta (thema); i bas kata enda lit i je tersirat sada pengertin maka Kesah Tuhan lit i bas kita guna nampati ras mereken gegeh guna ndalanken erbage-bage pendahin si ipercayakenNa man banta. Kata "gara" i jenda pe nuduhken maka lit i je sada gegeh, kengasupen guna ngalaken erbage-bage keadaan (bd. bagi api si gara). Ertina maka kondisi kesehaten, ekonomi, umur bage pe kondisi fisik la mpengaruhi semangat Saitun guna ncidahken buah kinitekenna arah ikut muat bagin i bas pelayanen sue ras gegeh, talenta ras kesempaten si ibereken Tuhan.

2.    Jadi alat si efektif i bas tan Dibata; mungkin pernah kita ngidah sada alat pertukangen multiguna si lit ije piga-piga alat penunjang e me: pisau gunting, obeng, kiker, pembuka tutup botol rsd. Cukup praktis mabasa ras kegunanna pe banci erbage-bage dahin ipakeken. Bage me pe Dibata i bas makeken kita guna mbebasken kalak si lit i bas erbage-bage perbeben geluh e me, kalak musil, si tertaban gelah ipulahi, si pentang erpengidah ras si itindas ipulahi. Kerina enda e me dahin si iampeken Dibata man banta.

3.    Kepercayan si ibereken Dibata labo erkiteken kengasupenta, tapi perban gegeh penampat Kesah Si Badia lanai terambati (Jer. 20:9). PengasupNa kita erberita, mbebasken kalak si ngenanami kiniseran, itaban perbeben, kerincuhen daging, kerangapen alu ngidah kerina si mehuli si isikapken Dibata.

IV. PERTOTON

Tuhan pengasupndu kami guna ngergaken kegeluhen si iberekenNdu, maka arah kerina si jadi i bas kegeluhen kami, jadi sada kesaksin kerna kuasa ras kelengNdu si la erngadi ngadi ipesehNdu man kami. SampatiNdu kami i bas makeken kesempaten si lit guna terus ngelakoken hal-hal si erguna sue ras gegeh, talenta si lit. Kesah Si Badialah tetap si nampati ras si mpengasup kami guna meritaken Berita Si Meriah janah mpebetehken masana Tuhan mulahi kerina manusia gelah pulah i bas tabanen ras penindasen nari, i bas Tuhan Jesus si enggo mbebasken kami reh kami ngataken bujur baNdu. Amin.

V. DISKUSI

1.   Turikenlah kai ertina: Kesah Tuhan gara i bas pusuhta !

2.   Erpalasken gegeh, talenta ras kesempaten si lit bahanlah sada aksi guna nehken sada penampat man kalak si deban si ncidah maka Tuhan enggo mulahi ia !

Aksi (bahan rencana kegiaten Saitun subuk secara pribadi bagepe kelompok erpalasken kengasupen si enggo iturikenna. Janah asa bancina rencana kegiaten enda iarak-arak pengurus Saitun)

VI . USULEN LAGU

1. ΚΕΕ 227: 1-3

2. KEE 187: 1,3

3. ΚΕΕ 197: 1,3,4

Adi Beganding deherken Kandibata Meser nanamna adi iketep lacina Kesah Tuhan gara i bas pusuhta Nampati kita ndahiken sini suruhNa

Pdt. Kasir Purba, STh