Persembahen

BIMBINGAN PA SAITUN GBKP TAHUN 2026

TANGGAL, 05-11 Juli 2026

Ogen : 1 Kronika 29:10-14

Daud muji Dibata

Indonesia:

[10] Lalu Daud memuji Tuhan di depan mata segenap jemaah itu. Berkatalah Daud: ”Terpujilah Engkau, ya Tuhan, Allahnya bapa kami Israel, dari selama-lamanya sampai selama-lamanya.

[11]  Ya Tuhan, punya-Mulah kebesaran dan kejayaan, kehormatan, kemasyhuran dan keagungan, ya, segala-galanya yang ada di langit dan di bumi! Ya Tuhan, punya-Mulah kerajaan dan Engkau yang tertinggi itu melebihi segala-galanya sebagai kepala.

[12] Sebab kekayaan dan kemuliaan berasal dari pada-Mu dan Engkaulah yang berkuasa atas segala-galanya; dalam tangan-Mulah kekuatan dan kejayaan; dalam tangan-Mulah kuasa membesarkan dan mengokohkan segala-galanya.

[13] Sekarang, ya Allah kami, kami bersyukur kepada-Mu dan memuji nama-Mu yang agung itu.

[14] Sebab siapakah aku ini dan siapakah bangsaku, sehingga kami mampu memberikan persembahan sukarela seperti ini? Sebab dari pada-Mulah segala-galanya dan dari tangan-Mu sendirilah persembahan yang kami berikan kepada-Mu.

Karo:

[10] I adep-adepen kerina perpulungen e ipuji Daud TUHAN nina, “TUHAN Dibata nu nini kami Jakup, terpujilah Kam asa lalap seh rasa lalap.

[11] Kam kap si mbelin, Kam kap si terberita, Kam kap si mulia, Kam kap si mehulina dingen Kam kap si Mada Kuasa. Kerina langit ras doni Kam si madasa, Kam kap raja, pemerentah i babo kerinana.

[12] Kerina erta-erta ras kebayaken rehen i bas Kam nari nge; Kam merentah kerinana alu kuasa ras gegehNdu. Janah Kam ngasup erbahan kalak jadi si mbelin dingen erkuasa.

[13] Genduari O Dibata kami, ikataken kami bujur man baNdu dingen ipuji kami gelarNdu si Mulia!

[14] Sabap bangsangku ras aku tuhu-tuhu la ngasup mere man baNdu, sabap kerina ialoken kami i bas Kam nari nge, janah kami ngulihkenca ngenca man baNdu kai si enggo iberekenNdu man kami.

Tema: Mere Sabab Enggo Leben Ngalo

Tujunna:

Gelah Saitun:

1. Ngangkai maka Dibata me ulu kerinana si lit ibas doni enda

2. Ermeriah ukur dingen bujur ibas mereken persembahen

Metode: Diskusi ras Erbahan Tekad

I. BENA KATA

Ibas proses pembangunen Rumah Pertoton i Jerusalem tangkas ikataken Raja Daud maka Rumah Pertoton e guna Tuhan labo guna manusia. Asa gegehna ilitkenna persedian guna pembangunen Rumah Pertoton eme: emas, pirak, tembaga, besi, kayu, batu permata syokam, mutiara, batu mosaik dingen melala batu marmar. Erkiteken keleng atena Rumah Pertoton e iberekenna ka pe ertana tole eme emas simejilena lebih seratus ton ras pirak menam 240 ton guna hiasen dingding Rumah Pertoton e dingen man kerina si ibahan tukang-tukang. Selain Raja Daud, kepala terpuk, pegawai suku, komendan meliter ras pengurus erta kerajan mereken pemere enda guna dahin Rumah Pertoton e alu meriah ukur. Iberekenna 170 ton emas, 310 ton pirak, 620 ton tembaga, 3400 ton besi. Ise si lit i bas ia batu-batu permata iberekenna e jadi erta Rumah Pertoton si iurus Jehiel kalak Lewi i bas terpuk Gerson nari. Seh kal riahna iakap bangsa Israel mere man Tuhan. Kai sierbahansa Raja Daud ras bangsa Israel nggit dingen ngasup mereken persembahen si mbelin man Dibata?

II. MPEGESI OGEN

1 Kronika 29:10-14 ncidahken pujin Raja Daud man Tuhan tupung mereken persembahen guna pembangunen Rumah Pertoton. Ibas teks enda si idah piga-piga pengajaren: St pemena, ibas 1 Kronika 29:10-11 teridah fokus perlembahen Raja Daud eme Dibata sierdolat. Raja Daud mimpin bangsana gelah muji dingen ngataken bujur man Dibata alu ukur meriah erkiteken nggo ibereken Dibata si mehulina man kerina tinepaNa. Kalak si nggejapken Dibata erdolat ibas kegeluhenna nggasup ngataken bujur man Tuhan ibas kerina dampar geluhna. Sipeduaken, 1 Kronika 29:12-13 ncidahken kiniteruken ukur Raja Daud si ngakui maka kengasupenna mere persembahen man pembangunen Rumah Pertoton labo erkiteken gegehna tapi pelin-pelin erkiteken perkuah ate Dibata simereken kengasupen man bana guna ersembah. Raja Daud sedar maka kerina erta-erta, kebayaken, kuasa ras gegeh si lit ibas ia rehna ibas Dibata nari sabab IA kap si mada kerina si lit ibas doni, janah manusia eme pengelola pemere Tuhan e. Emaka arus sikelola kerina pemere Tuhan alu bujur dingen guna kemuliaanNa. Sipeteluken, ibas 1 Kronika 29:14 ningetken kita gelah ermeriah ukur ras bujur ibas mereken persembahen. Persembahen si mehuli reh ibas pusuh si enggo nggejapken kiniulin Tuhan. Raja Daud ncidahken pusuhna si dem alu pengataken bujur ibas pujinna. Ngasup ia mere erkiteken enggo leben ngalo ibas Tuhan nari. Dibata me ulu kerinana si lit ibas doni enda, emaka manusia ngulihkenca ngenca. Ibas mereken persembahen ula alu ukur jungut-jungut, ntah pe terpaksa, tapi erkiteken keleng ateta man Tuhan.

IV. PENGKENAINA

Lit si erpengakap maka mere persembahen eme mere kai si rehna ibas kita nari, misalnya erkiteken bekasta encari, erbintuas erdahin ras ngkeris panas. Tapi adi sirenungken alu payo, lit nge ndia si lit ibas kita enda rehna ibas kita nari? Ma ibas Tuhan nari nge kerina rehna? Gegehta guna encari e pe rehna ibas Ia nari. Kita ngasup mere persembahen erkiteken kita enggo leben ngalo bas Tuhan nari. Penggejapen si bage me sierbahansa Raja Daud lanai alang-alang riahna iakapna tupung mereken persembahen man Dibata. Kita pe ngumban perbahanen Daud ras bangsa Israel muji Dibata sabab si gejap maka labo kita ngasup mere man Tuhan. Siakuken min maka kerina si lit ibas kita sialoken ibas Tuhan nari janah iulihkenna man baNa. Emaka tupung mereken persembahen si gejapkenlah maka Dibata me ulu kerinana si lit ibas doni. Si sehkenlah persembahenta alu meriah ukur ras bujur.

V. PERTOTON

O Dibata Si Mada Kuasa, ibas Kam nari kap kerina sinasa lit. Ikataken kami bujur man baNdu, sabab icukupkenndu kerina keperlun kami. Alu meteruk ukur kami mindo man baNdu gelah iajariNdu kami ngataken bujur ras mereken persembahen man baNdu alu payo. KesahNdu si Badia nampati kami, ibas gelar Jesus Kristus kami ertoto. Amin.

VI. DISKUSI RAS ERBAHAN TEKAD

1. Kai sierbahansa Raja Daud ras bangsa Israel nggit dingen ngasup mereken persembahen si mbelin man Dibata guna pembangunen Rumah Pertoton?.

2. Turiken ngkai maka kita mereken persembahen man Dibata? Janah uga sikapta tupung mereken persembahen?

3. Bahan tekadndu gelah ermeriah ukur dingen bujur ibas mereken persembahen!

VII. USULEN LAGU

1. KEE GBKP No. 354:1-3

2. KEE GBKP No. 385:1-2

3. KEE GBKP No. 302:1-2

4. KEE GBKP No. 343:1-2

Pdt. Bertha Wandasari Sinukaban, M. Th