Ersembah

BIMBINGAN PA SAITUN GBKP TAHUN 2026

TANGGAL, 12-18 Juli 2026

Ogen : Heber 13:15-16

Cara ndalanken si ngena ate Dibata

Indonesia:

[15] Sebab itu marilah kita, oleh Dia, senantiasa mempersembahkan korban syukur kepada Allah, yaitu ucapan bibir yang memuliakan nama-Nya.

[16] Dan janganlah kamu lupa berbuat baik dan memberi bantuan, sebab korban-korban yang demikianlah yang berkenan kepada Allah.

Karo:

[15] E maka sisehkenlah puji-pujin man Dibata katawari pe, si jadi persembahenta arah Kristus, e me persembahen arah babah si ngakui maka IA kap Tuhan.

[16] Ola lupa erbahan si mehuli dingen sisampat-sampaten, sabap si e me persembahen si ngena ate Dibata.

Tema: Persembahen Si Ngena Ate Dibata

Tujunna:

Gelah Saitun:

1. Ngangkai maka puji-pujin, erbahan mehuli, siampat-sampaten e pe persembahen man Dibata.

2. Ergiah-giah rende, nampati ras erbahan si mehuli.

Metode: Studi kasus

I. BENA KATA

Sekali jadi, sekalak anak si sangana sekolah i SMP nungkun man bapana, ia sekalak Pertua. Penungkunen e merupaken Pekerjaan Rumah (PR) anak e bas Guru Agama i sekolahna nari. Penungkunenna, bagenda: Pilih bas 2 (dua) pernyataan enda apai si benar rikutken pengaajaren bas gerejandu ?. Si Pemena: Kita enggo kap leben iselamatken Dibata alu nebusi kita arah pengorbanen anakNa Jesus Kristus si mate i kayu persilang i Uruk Golgota. E maka kita selaku Kalak Kristen rutang guna ngataken bujur man Dibata bas keselamaten si enggo sialoken e. Si Peduaken: Situtusi erkiniteken janah melala sibahan si mehuli, gelah man banta pagi keselamaten e.

E maka ijawab bapa ndai man anakna, "Kita enggo leben iselamatken, sebab sanga erdosa denga pe kita enggo iwujudken Tuhan keselamaten e man banta, e maka utangta bas kegeluhen enda, e me la erngadi-ngadi ngataken bujur man Dibata bas keselamaten si enggo iberekenNa man banta".

II. MPEGESI OGEN

Tuhan Jesus enggo engkorbanken diriNa, gelah darehNa mbersihken kita i bas dosa nari. Ia kap Imam si Mbelinta, si lanai mindo kerna korban persembahen subuk kambing ntah biri-biri guna ngalemi dosa-dosanta. Ia imamna janah la ka jadi korban persembahenna, e maka Ia igelari Imam Agung/Imam si Mbelin. (Heber 7:26-27). Sada korban persembahen Anak Biri-Biri ni Dibata (Jesus Kristus) si ikorbanken i datas Uruk Golgota, cukup guna nebusi kerina manusia, seh ngayak kerehen Jesus peduakaliken, sada korban e guna kerinana, si mengimanisa. E maka man kerina manusia si ndarami keselamaten, ndarami kuta si tetap e, ndarami kegeluhen si rasa lalap e, arah pengorbanen Jesus e me dalanna. Janah enda dalan terkelin ku bas geluh si rasa lalap, e me arah mengimani kematen Kristus, sebagai korban penebusen si sah nandangi dosanta.

E maka bicara menderita ras igombang-gombangi pe kita bas kita mengimani, penebusenNa e, labo dalih ras rela kita, sebab adi banding kerna kiniseran si genduari e ras kemulian si pagi ibereken man banta, labo kai kal pe (banci iabaiken).

Erdandanken si e sisehkenlah puji-pujinta man Dibata alu la erngadi-ngadi, janah si peseh pengataken bujurta arah Kristus, e me persembahen arah babah singakui maka Ia kap Tuhan, Ia kap Imam Si Mbelinta, si nebusi kita alu darehNa si mambur i Golgota. Tambah si e kita harus erbahan si mehuli dingen nggeluh sisampat-sampaten, sebab e kap persembahen si ngena ate Dibata. Alu kata si deban bagi nina Paulus, "Persembahkenlah kulandu, selaku persembahen si nggeluh, sebab bage me arusna kam ersembah selaku mahluk si rukur". (Roma 12:1). Alu bage lanai bo tupung kita nehken pengataken bujur ngenca kita nehken persembahen.

IV. PENGKENAINA

Dage selaku kalak Kristen, la banci lang harus sisadari kerna sejarah kegeluhenta, maka kita manusia situhuna mbarenda enggo bene erkiteken dosa, menai kin ninita Adam ras Hawa ndabuh ku dosa. Janah kita mate rasa lalap I neraka, erdandanken kematen e kap upah dosa. I bas si e, kita la  ngasup mulahi bana. Mekuah ate Dibata kita maka iberekenNa anakNa Jesus Kristus, jadi Imam si Mbelinta, itebusiNa kita bas dosa nari; bas si e tentu bersyukur kal kita, lanai erngadi-ngadi kita ngataken bujur bas perkuah ateNa e. Memang bas kegeluhenta, adi ngerana kita kerna persembahen, minter terbayang kita kerna materi, si jadi persembahen man Tuhan. Si e pe memang payo nge, janah perlu kal nge e. Tapi perlu sisadari maka ergan nge iakap Tuhan kerna kerehenta ku Ia ras pertobatenta asang si e (persembahen material) ndai kerina. E maka persembahen pengataken bujur si ngenana kal ate Dibata sisehken bas kegeluhenta e me ngendesken geluhta sebagai persembahen si nggeluh, alu pengertin:

1. Nggeluh kita bas pertobaten rikut ras pengendesn man baNa, nggeluh bas kekelengen subuk man Dibata, bage pe sikelengi temanta manusia/ rikut ras alam enda.

2. Sidalanken tugasta selaku kalak si erkiniteken, e me: a. Ersaksi ras erberita si meriah. b. Erdiakonia: nggeluh sisampat-sampaten arah talenta ras kapasitasta si lit. c. Sipegegehi persadanta secara vertikal ku Dibata, je reh ngtasupna ka kita peteguhi persadanta secara horizontal bas sesama kita manusia.

V. PERTOTON

Tuhan Dibata si ngkelengi kami arah pertebusen si isehkenNdu bas anakNdu Jesus Kristus, Tuhan kami. I bas kami enggo iselamatkenNdu arah pengorbanen AnakNdu Jesus e, e me kepe si jadi utang kami bas kegeluhen enda, e me tetap kami bersyukur ras nehken persembahen kami, alu ngkelengi kam Tuhan ras ibahan kami si mehuli man teman kami manusia, bag e man alam enda. I bas gelar Jesus Kristus, Tuhan kami. Amin.

VI. STUDI KASUS

Sekali jadi lit sada keluarga atena erbahan kerja meriah e me mengket rumah si enggo ibangunna. E maka itenahkenna kerina sangkep nggeluh, subuk sembuyak, senina, sipemeren, siparibanen, sendalanen ras sepengalon, ras kalimbubu terus ku puang kerina, la ketadingen anak beru, anak beru minteri ras singukuri kerina, bage pe ras teman meriah kerina. E maka reh nina anak beru man si mada kerja enda, "Kami anak berundu bicara la gia kami pagi reh bas dahin e, tapi galang-galang pagi tama kami pertama kami, ma labo kitik ukurndu, kalimbubu? Nungkun ngenda kami". Reh nina kalimbubu ndai, "Madin kena la erpertama gelah reh kena kerina", nina, alu agak emosi ia erbelas. Tungkuk kerina anak beru ndai, janah nina ngaloi, "Adi bage reh pagi kami kerina, kalimbubu".

Diskusi

1. Engkai madin akap kalimbubu ndai reh kerina anak beruna, asangken sumbangen si mbue ipeseh man bana ?

2. Payo nge siakap adi lit kalak Kristen, persembahenna secara materi ngenca ipesehna ku gereja, tapi ia la reh-reh. Malem nge ate Dibata natap anakNa si bage rupana ? Janah turiken dage persembahen si uga nge si ngenana kal ate Dibata si peseh?

VII. USULEN LAGU

1. KEE No. 191:1-2.

2. KEE No. 282:1-2

3. KEE No. 184:1-2.

4. KEE No. 212:1, 4.

Pdt. Kongsi Kaban, STh