Perbahanen Elem-elem

BIMBINGAN PA SAITUN GBKP TAHUN 2026

TANGGAL, 19-25 Juli 2026

Ogen : Imamat 19:17

Undang-undang kerna kebadian ras keadilen

Indonesia:

[17]  Janganlah engkau membenci saudaramu di dalam hatimu, tetapi engkau harus berterus terang menegor orang sesamamu dan janganlah engkau mendatangkan dosa kepada dirimu karena dia.

Karo:

[17] Ola buniken elem-elem i bas ukurndu man ise pe tapi tangkas ukur tangkas kata lah ndungi perjengilenndu ras ia, gelah ola kam erdosa erkiteken ia.

Tema: Tangkas ukur tangkas kata

Tujunna:

Gelah Saitun:

1. Nuriken engkai maka banci turah elem-elem i bas ukurnta

2. Daftarken kai ulih negative elem-elem ras kuga cara ndungi elem-elem.

Metode: Diskusi ras Aksi

I. BENA KATA

Tep-tep kegeluhen rikut ras budaya iatur orat geluhna rikut ras kebiasan idalani sue ras nilai-nilai si igelemna. Nilai ras orat geluh enda jadi rikutken konsep kiniteken si lit ibas ia. Kuga arusna njagai geluh gelah sikap ras ncidahken kegeluhen si dem kekelengen, er-Dibata, erturang senina, er-anak kempu. Kerina si mehuli enda me si jadi palas ibas nehken pedah ras kata persinget guna nggeluh alu payo ras ratur.

II. MPEGESI OGEN

Rabi-rabi Jahudi, mereken gelar kitab Imamat sebage buku 'panduan iman' sabab isina kuga arusna bangsa e nggeluh alu ndalanken kebaktin, maba persembahen dingen nggeluh alu badia. Alasen ibas ndalanken kerina aturen dingen pedah enda eme erkiteken kekelengen Dibata si enggo icidahkenNa man bangsa Israel si enggo maba ia ndarat i Mesir nari. Peraturen si jadi panduan, si isehken Dibata man bangsa enda desken payung si njagai, ngelinggemi dingen jadi palas bangsa enda ngelakoken dahin ras ndalani kegeluhen.

Bindu 19 enda nuriken cara bangsa enda nggeluh badia Pedah Dibata ibahan pedah dingen aturen (panduan) ndalanken singena ate Dibata. Si latarbelakangna Sepuluh man Dibata. Erpalasken kegeluhen singkelengi sapih-sapih kegeluhen sitep-tep warina si ncidahken bangsa si malang manusia ibahan me aturen sosial itengah kegeluhen bangsa enda. Sijadi bahan PA paksa enda eme bagin nggeluh erdame ras kerina kalak, eme:

a. Ula buniken elem-elem man isepe bas ukurndu. Elem-elem e me dendam, nembeh ate, la senang ukur nandangi kalak sideban. Si enda banci jadi, uluna erkiteken lit perjengilen, la siangkan nembeh ate dingen persoalen si la terdungi. Amin pe terdungi, i bas pusuh ras ukurna langa erkedungen si banci mpeturah pinakit (luka batin, akar pahit) dingen lit sura-sura erbalas. Job pernah ngataken maka elem-elem enda desken kalak longor (Job 5:2), adi longor la terajari, laterikutken bage pe ikataken kalak perguak dingen la terteki (Kuan-kuanan 10:18; 26:25). Elem-elem e pe bali ras api i bas ginuhur si gara (Hosea 7:4) ras gurlah si banci mahan meseng dirina bagepe kalak si deban. Ertina, sitik pe labo man asuhen biak si elem-elem.

b. Tangkas ukur tangkas kata ndungi perjengilen. Erjengil dingen perjengilen megati kal turah i bas hubungenta bas jabu, keluarga, sangkep nggeluh bagepe relasi sosialta subuk pertemanen i gereja ntah pe masyarakat. Emaka gelah ula jadi e perlu kal ngerana, ercakap-cakap i bas pusuh nari (mbangun komunikasi alu mehuli). Ercakap-cakap ntah lit si jadi penengahna (mediator) ntah lang pe labo dalih, ukur ersuruh i bas dua belah pihakna perlu kal ilakoken. Tangkas ukur tangkas kata, ertina lit keterbukaan i bas pusuh pekepar si kedungenna ngasup pupursage, sialem-alemen seh maka erdame sada ras si debanna.

c. Gelah la erdosa erkiteken ia. Elem-elem, perjengilen dikune la terdungi ntah terdameken banci nambahi persoalen sidebanna si mahan kita ndabuh kubas dosa. E maka ipersingeti kalak Israel, silahilah dosa e sabab tujun pedah ras undang-undang Dibata gelah nggeluh alu mehuli dingen ndalanken si ngena ate Dibata. Janah nggeluh la erdosa erkiteken ndalanken perentah Dibata

Bage me kegeluhen si la harmonis ras kalak si deban i ja 'relasi' sosialta ceda i je me hubugenta ras Dibata pe lanai mehuli.

IV. PENGKENAINA

Erbage-bage biak manusia si lit itengah-tengahta. Lit si meriah akapna katawari pe, ngerana tangkas ukur tangkas kata, lit deba la lit saringna, la beluh erbuni-buni kerna kai pe. Lit ka biak si seh kal serana megi sorana, jarang ngerana, la terbuka, kai pe si jadi bunikenna bas pusuhna. Janah alu la iarap banci saja kerina ibunikenna bas pusuhna si kedungenna mahan luka pusuh bagepe melala elem-elem. Ulih elem-elem enda sitik pe labo lit kiniulinna, tapi ncedai:

·       Kesehaten (nandangi dirinta jine): la tangkas ukur tangkas kata tapi muniken i bas pusuh si mpeturah elem-elem e banci mabai ukur la teneng, latih rukur (stress) ngukuri kerna si lapayo, ersura-sura erbalas seh maka (cemas) seh pe banci lemas.

·       Pertemanen e me hubungen ras kalak, la saja ncedai diri tapi pe ncedai pertemanen. La saja ras kalak si nembeh ateta tapi pe ras temanna ka pe si peturah ukur la mehuli, ia pe nembeh ateta. Alu bage tambah ateta nembeh dingen urak ka temanta.

·       Kiniteken (hubungenta ras Dibata): kepeken sanga la kita ngasup ngalemi kalak si deban turah sura-sura erbalas. Tapi jelaskal nina Dibata, alemi temanndu, ula elem-elem (Mat. 5:43-44) sabab erbalas e hak Dibata (Rom. 12:19) Alu bage kai si arus si lakoken:

·       I bas kerina kecibal kegeluhenta perlu kal erdame ras dirinta jine sabab mbue hal si la bagi ukurta menaken kitik-kitik nari seh paksa enda, ula ngasuhi morah ate, menek-menek ras si debanna.

·       Erdame ras kalak si la bagi ukurta si hadiri bas perdalanen geluhta amin kentisik tapi ngelukai pusuhta, ula kal iasuhi, tapi alemi, alu bage banci bahagia kita ndalani kegeluhenta

·       Perlu kal mbangun komunikasi si trampil ras ngasup nehken perukuren (pendapat), jujur, tegas dingen tetap ngergai kalak si deban. Ijenda me biak tangkas ukur tangkas kata.

V. PERTOTON

O Dibata, ulu perdamen, bujur kal iakataken kami man bandu. Pepalem kal pusuh kami si lit denga elem-elem. Pengasup kami ngerana nuriken ukur kami alu tangkas gelah la lit turah er-embeb-embeb i bas pusuh kami. Ajari kami, dingen Kesah Si Badia mpengasup kami. Amin.

VI. DISKUSI RAS AKSI

1. Turiken kai kawiten elem-elem ras tangkas ukur tangkas kata!

2. Pernah nge lit pengalamenndu erelem-elem? Dikune lit turiken dingen kai ulihna?

Aksi:

·       Inget-inget kalak si pernah lit elem-elemndu man bana

·       Dahilah ia, dikune ndauh teleponi, ngeranalah nuriken ukur alu jujur, tegas dingen bahanlah perdamen ras ia

VII. USULEN LAGU

1. KEE No. 204:1,4

2. KEE No. 369:1-2

3. KEE No. 15:1-2

4. KEE No. 182:1-3

Pdt. Suenita Br Sinulingga