Aku Megegeh Erkiteken Tuhan
Negusa
BIMBINGAN PA SAITUN GBKP TAHUN 2026
TANGGAL, 12-18 April 2026
Ogen : Masmur 94:18-19
Dibata kap si jadi hakim man kerina kalak
Indonesia:
[18] Ketika aku berpikir: ”Kakiku goyang,” maka kasih setia-Mu, ya
Tuhan, menyokong aku.
[19] Apabila bertambah banyak pikiran dalam batinku, penghiburan-Mu
menyenangkan jiwaku.
Karo:
[18] Tupung aku rukur, “Ndabuh
me aku”, i je keleng ateNdu si tetap erbahanca aku lalap paguh.
[19] Kune la tetap ukurku dingen
aru ateku, Kam si ngapuli dingen si periahken ateku.
Tujunna:
Gelah Saitun:
1. Meteh ras Nggejapken Keleng Ate Dibata Bagepe Pengapul Na
2. Naksiken Pengalaman Pengkelengi Dibata.
Metode : Diskusi
I. BENA KATA
I bas tahun enda siperingeti me 11 tahun enggo seh umurna Saitun GBKP.
Aminna gia umur Saitun GBKP enda nguda denga, tapi semangatna teridah arah ikut
muat bagin i bas kegiaten PA, PJJ, Koor, kegiaten Diakonia bage pe mereken
persembahen. E maka i bas umurna si enggo 11 tahun enda pe tetaplah Saitun ikut
muat bagin guna memajuken kategorial si debanna. Ula si kurang-kurangi
semangatta ncidahken keleng ateta man anak kempunta, sabab tek kita maka Tuhan
tetap sinegu-negu kita gelah tetap megegeh ras paguh.
II. MPEGESI OGEN
Judul kitab Masmur 94 enda e me: Dibata kap si jadi hakim man kerina
kalak. Pemasmur ngidah ras nggejapken kuga kin belinna kuasa Dibata lako
ngakimi manusia si lit i doni enda si la ndalanken sura-suraNa., bage pe ngidah
perbahanen Dibata si luar biasa i bas kegeluhenna. Kalak si megombang man
Dibata bage pe man bana, enda pagi Dibata ngukumsa. La lit hak permasmur guna
erbalas, sebab e kerina hak Dibata. E maka nina Pemasmur: Aku megegeh erkiteken
Tuhan Negusa, enda me temanta bas wari enda. Arah tema enda ate Dibata gelah
kerina kalak banci tetap megegeh aminna pe erbage-bage kejadin si nderpa kubas
kegeluhen manusia. Bas kegeluhen kalak si erkiniteken, aminna gia lanai megegeh
secara daging kula tapi tetap nge setia nandangi pendiloNa. Si enda kerina
erkiteken igejapkenna penegu-negu Dibata, arah pengapul siniberekenNa gelah
tetap megegeh i bas ndalani kegeluhen enda.
I basa Masmur 94: 18 ngingetken man banta nina: tupung aku rukur, ndabuh
me aku; i je keleng ateNdu si tetap erbahanca aku paguh. Jadi tangkas kal
isingetken permasmur maka aminna gia megati kal ndabuh erkiteken erbage-bage
soal, mungkin sakit pinakit, la bagi ukur si reh nderpa ku kegeluhen, tapi i je
me Dibata negu-negu ras ngangkat kita bagi nina ende-enden rohani: Walaupun aku
terjatuh, namun tidak sempat tergeletak. Engkai.... erkiteken Dibata sinatang
kegeluhenta, janah kita pe tetap paguh i bas ndalani wari-warinta bas doni
enda. I bas ayat 19 pe tangkas ituriken maka; kune la tetap ukurku dingen aru
ateku, Kam si ngapuli dingen si periahken ateku. Alu keleng ateNa si mbelin man
manusia maka i bas kerina kecibal geluh manusia maka IA tetap nge negu-negu,
ngapuli dingen mereken keriahen i bas wari-wari kegeluhenta seh ngayak metua.
Arah si e me maka banci pe kita nuri-nuri kerna pengalamen geluhta man kalak si
deban, gelah alu bage radu ras pe kita megegeh ndalani kegeluhen enda.
III. PENGKEΝΑΙΝΑ
1. Bas umur Saitun si enggo 11 tahun dekahna marilah si cidahken tanda
keleng ate Dibata si enggo si aloken arah kedewasan kinitekenta i bas ndalani
wari-wari kegeluhen enda. Kita arus jadi usihen nandangi anak kempunta.
2. I bas ndalani wari-wari kegeluhenta arus si sadari maka erbage-bage
kiniseran ras perbeben reh nderpa kegeluhenta, tapi ula erkiteken kiniseran e
erbahanca lupa kita kuasa ras kemulian Dibata si tetap natang natang ras
negu-negu kegeluhenta.
3. Selaku Saitun i bas umurta si enggo metua enda tentu melala enggo si
alami kuga kekelengen Dibata man banta, janah enda perlu si saksiken man kalak
si deban arah kita nuri-nuri pengalamen geluhta, bagi pengalamen Raja Salomo
nina: tanna si kawes natang takalku, alu tanna si kemuhen isapu-sapuna aku
(Ende-Enden Salomo 2:6)
IV. PERTOTON
Bujur Tuhan i bas keleng ateNdu si tetap isehkenNdu man kami, arah
penegu-neguNdu ras pengapul i bas Kam nari erbahanca kami megegeh. Pengarapen
kami gelah Kesah si Badia tetap min nemani kami lako mereken gegeh ras
kengasupen lako naksiken keleng ateNdu i bas gedang-gedang geluh kami,
erkiteken Tuhan Jesus Kristus si jadi Tuhan ras Juruselamat kami. Amin !
V. Diskusi
1. Kai nge erbahanca maka Permasmur tetap megegeh i bas ngalaken
erbage-bage perbeben nggeluh ?
2. Kai nge si gejapken i bas wari-wari kegeluhenta kerna : I bas Dibata
la lit si metahat!. Turiken pengalamenta sekalak-sekalak.
VI. ENDE-ENDEN
1. KEE No. 187: 1,3
2. KEE No. 307: 1-3
3. ΚΕΕ NO. 202: 1-3
Pdt. Andarias Brahmana
