Pentakosta

BIMBINGAN PA SAITUN GBKP TAHUN 2026

TANGGAL, 14-20 Juni 2026

Ogen : Roma 8:26-27

Pengarapen anak-anak Dibata

Indonesia:

[26] Demikian juga Roh membantu kita dalam kelemahan kita; sebab kita tidak tahu, bagaimana sebenarnya harus berdoa; tetapi Roh sendiri berdoa untuk kita kepada Allah dengan keluhan-keluhan yang tidak terucapkan.

[27] Dan Allah yang menyelidiki hati nurani, mengetahui maksud Roh itu, yaitu bahwa Ia, sesuai dengan kehendak Allah, berdoa untuk orang-orang kudus.

Karo:

[26] Bage me pe Kesah Dibata reh nampati kita, kita si kote enda. Sabap la sieteh kuga arusna kita ertoto; Kesah e me ertoto kerna kita man Dibata alu kelsehen si la terbelasken.

[27] Dibata si ngidah pusuh peraten manusia, meteh kai sura-sura Kesah; sabap Kesah e mindo man Dibata guna anak-anak Dibata, janah sue ras peraten Dibata.

Tema: Kesah Dibata kap Penampatta

Tujunna:

Gelah Saitun:

1. Meteh Maka Kesah Si Badia Jadi Penampat Man Kalak Kote.

2. Sadar Maka I bas kekotenta Isampati Kesah Dibata.

Metode: Diskusi

I. BENA KATA

Wari raya Pentakosta e me salah sada wari raya si mbelin sini peringeti kita i bas gerejanta GBKP enda, e me wari peringeten kerna nusurna Kesah Si badia. I bas nusuma Kesah Si Badia enda me ajar-ajar Jesus iperlengkapi guna nehken dahin ras tanggung jawab si enggo i endesken Tuhan Jesus ope denga IA nangkih ku surga. Jesus pernah ngataken man ajar-ajarNa nina: ola tadingken kuta Jerusalem tapi timailah pemere si enggo ipadanken Bapangku sue ras si enggo Ku kataken man bandu (Perb. 1 : 4 b). E maka payo kal si ikataken Jesus e, maka Kesah Si Badia ndai nusur guna mereken semangat ras gegeh man ajar-ajarNa (Perb. 2). Kenca reh Kesah Si Badia maka ajar-ajar pang meritaken Berita Si Meriah. Ku kerina jelma gelah manusia banci jadi ajar-ajar Jesus (matius 28: 19).

Bage pe genduari maka kerina kalak si tek man Jesus ertanggung jawab guna nehken Berita Si Meriah e, sebab kita pe enggo me idemi Kesah Si Badia si jadi penampat man banta gelah tetap megegeh ras semangat i bas ndahiken pebelangken Berita Si Meriah e.

II. MPEGESI OGEN

Kata Dibata si man oratenta i bas PA nta wari si sendah e me surat Rasul Paulus man perpulungen Roma, ija tulisen enda isehkenna guna persikapen perkunjungenna ku Roma. Sebab paksa si e kegeluhen perpulungen i Roma ipengaruhi cara rukur secara doni, e maka megati denga ergan akapna doni enda asangken kata Dibata. Dekahen ia ngukuri kerna jasmani piah lupa ia ngukuri rohani. E maka Rasul Paulus nehken persinget gelah ula ipengaruhi hal-hal doni saja nina: kiniseran si nanami kita genduari e labo kai kal pe adi ibandingken ras kemalemen ate si pagin i petangkas Dibata man banta (Roma 8: 18). Arah enda tangkas ikataken Paulus maka Kesah Dibata e erdahin arah kai pe guna nampati kalak si tek. I bas kerina si terjadi nandangi kegeluhen manusia maka megati nge mamang ateta, sabab la ngasup kita ngukurisa. Enda kerina banci jadi erkiteken Kesah Dibata si nampati kerina kegeluhen manusia. Kalak si enggo idemi Kesah Dibata lanai biar-biaren ndalani kegeluhenna sabab lit si nampati. I bas bahan PA nta wari enda ituriken maka Dibata ngidah terus ku pusuh peraten jelma kerina. Sabab kai pe si isuraken bas geluh enda kepeken Kesah e nge si ngajari gelah jelma meteh mindo man Dibata.

E maka kai si ialoken jelma e me iakap Dibata si pas, e maka la lit dalanna jelma ngataken maka Dibata la bujur. Sebab Kesah e enggo mindo man Dibata guna kerina anak-anakNa.

IV. PENGKENAINA

Arah keterangen idatas ndai enggo tangkas man banta Saitun maka Kesah Dibata e me nampati kita guna ndalani wari-wari kegeluhenta, susah ntah senang, sehat ntah sakit, meriah ukur ntah ceda ate la pernah IA nadingken kita seh pe kita enggo metua. Janah i bas kekotenta pe IA reh nampati kita. Bagi Jesus nampati ajar-ajarNa sanga ngepari danau Galilea nina; "engkai maka kam mbiar kal"? (Mark. 4 : 39). Arah kekotenta sebagai Saitun maka ije me Kesah Dibata ndai mpegegehi kita kerina, arah perbahanenNa e maka megegeh kita kerina. Lanai perlu kita mbiar ndalani geluhta enda, sabab setiap wari Kesah Dibata eperdiateken dingen nampati kita.

V. PERTOTON

Bujur Tuhan i bas penampatndu si tetap isehkenNdu i bas kegeluhen kami si erbahanca kami tersampat dingen megegeh. Erpengarapen kami tole gelah Kesah Si Badia e si ndemi pusuh peraten kami gelah dikune pe kami kote ngalaken erbage-bage tantangen, tapi kami tetap megegeh lako naksiken keleng ateNdu man kerina manusia, lanai kami mbiar ngalaken perbeben nggeluh sabab Kesah Si Badia e si nampati kami. Erkiteken Tuhan Jesus kami reh ras ngataken bujur man baNdu. Amin       

VI. DISKUSI

1. Jelasken kerna kata: Kesah e me ertoto kerna kita man Dibata alu kelsehen si laterbelasken (ayat 26 b).

2. Turiken man temanta, pengalaman Dibata mbebasken kita arah kekotenta.

VII. USULEN LAGU

1. KEE 26:1,2

2. KEE 197: 1,2

3. KEE 245:1-3

4. KEE 381 :1,3

Pdt. Andreas Brahmana