ACC

BIMBINGAN PA SAITUN GBKP TAHUN 2026

TANGGAL, 21-27 Juni 2026

Ogen : Masmur 37:1-6

Kedungen kalak jahat dingen kalak bujur

Indonesia:

[1] Dari Daud. Jangan marah karena orang yang berbuat jahat, jangan iri hati kepada orang yang berbuat curang;

[2] sebab mereka segera lisut seperti rumput dan layu seperti tumbuh-tumbuhan hijau.

[3] Percayalah kepada Tuhan dan lakukanlah yang baik, diamlah di negeri dan berlakulah setia,

[4] dan bergembiralah karena Tuhan; maka Ia akan memberikan kepadamu apa yang diinginkan hatimu.

[5] Serahkanlah hidupmu kepada Tuhan dan percayalah kepada-Nya, dan Ia akan bertindak;

[6] Ia akan memunculkan kebenaranmu seperti terang, dan hakmu seperti siang.

Karo:

[1] Masmur Daud. Ola atendu nembeh kempak kalak jahat, ola mecimberu ngenehen kalak si erbahan jahat. 

[2] Sabap bali ras dukut si kerah, minter me ia masap, mate me ia desken sinuan-sinuan si melus. [

3] Ernalemlah man TUHAN, dingen lakokenlah si mehuli, gelah kam la biar-biaren nggeluh i bas negeri e. 

[4] Daramilah kemalemen atendu i bas TUHAN, maka isehkenNa sura-surandu. 

[5] Endesken dirindu man TUHAN, ernalemlah man baNa, tentu isampatiNa kam. 

[6] IbahanNa maka kinibujurenndu ersinalsal, desken sinalsal matawari pantek ciger.

Tema: Ernalem man Tuhan, lakoken si mehuli

Tujunna:

Gelah Saitun:

1. Nginget maka adi ernalem man Tuhan, la lit kai pe man kebiarenken.

2. Erguna maba perubahen ku si mehuli itengah-tengah kalak jahat.

Metode: Diskusi

I. BENA KATA

Sasaren pelayanen GBKP Tahun 2026, njadiken gereja si nggeluh sue ras kecibalna. Enda ilakoken fokus kubas penguatan spiritualitas. Alu bage kehadiren gereja, mereken dampak positif man anggota GBKP ras masyarakat sekitar.

Kita itepa Dibata sue ras tempasNa, kita istimewa, hubungenta istimewa ras Dibata, iberekenNa hak guna nguasai ras njagai doni ras kerina isina. Kita erkiniteken, emaka lit kengasupen rukur mehuli, naluken peraten daging ras sura-sura doni enda. Manusia ipengasup ernalem man Tuhan ras la erleja-leja erbahan si mehuli. Penungkunenna, nggit nge kita ngaloken ras ngelakokenca ntah lang?

II. MPEGESI OGEN

Judul perikop bahan PA-nta minggu enda, ngataken "Kedungen kalak jahat dingen kalak bujur".

Ayat 1, Daud nehken nasihat, gelah ola ernembeh ate ntah cian nandangi kalak jahat.

Ayat 2, nuriken maka banci saja kalak jahat teridah sikap, tapi labo rasa lalap. Bagi dukut, minter kerah ras masap. Mate, desken sinuan-sinuan si melus.

Ayat 3, eme pesan utama: dahiken saja, kai si jadi baginta alu mehuli ras payo. Tetap setia ngikutken ajaren Tuhan.

Ayat 4, ngajuk gelah njaga relasi ras Tuhan, sendalanen ras Pilipi 4:4 Meriah min siakap, erkiteken persadanta ras Tuhan. Adi enggo si dalanken baginta alu payo, teklah maka Tuhan pe ndalanken baginNa ibas nehken sura-suranta simehuli. Ayat 5, 'angkat tangan' jadi bukti ngendesken rencana ras geluh i teruh kendali ras pengaturenken Tuhan si erkuasa, maka Tuhan 'turun tangan' erbahan si mehulina man banta, alu cara ras waktu si tepat man banta.

Ayat 6, la perlu iraguken, maka Dibata membela kinibujuren. Seh kinibujuren desken ersinalsal matawari pantek ciger, ertina kebujuren e tangkas ras terang benderang.

IV. PENGKENAINA

Lit kuan-kuan, "Bagi sinatap deleng, dauh nari melinang deheri merutu", ertina la sue tampilen ras kinatana. Erkiteken sie, megati kalak tertipu.

Bage me, arah bahan PA Saitun minggu enda, Daud nehken nasihat gelah ola cian ate, nandangi kalak si senang pergeluhna, amin pe e ulih pendahin alu cara-cara dalan pintas ras la bujur. Sabap kedungenna, desken sinuan-sinuan melus nge. Erkiteken sie, tetaplah dahiken si jadi baginta, lakoken si mehuli, ernalem man Tuhan, lakoken si ngena ate-Na. Pasti, Tuhan mereken si mehulina man banta. Melala godaan, pengajuk ras tantangen nggeluh, si lit isekelewetta, sierbahanca terganggu kiniteken ras turah keraguan, kebiaren i bas pusuhta nandangi perbahanen Dibata ibas geluhta. Ibas sie, siingetlah maka adi ernalem man Tuhan, la lit kai pe man kebiarenken. Sabab man kalak siernalem man Tuhan, sue ras padanNa man Abraham, "Kupasu-pasu kalak si masu-masu kam janah Kusumpahi kalak sinumpahi kam", ertina ibas kerina kecibal geluhta, Dibata simasangkenca, Dibata ras kita, Dibata jadi benteng, singkawali dingen mpekena-kena kita.

Kinatana lit genduari siermengga ate nandangi kejahaten, sabab teridah tempa-tempa meriah, mehuli ras sikap. Situasi enda bagi pinakit si berbahaya sabab kedungenna mpereh rawa Dibata. Adi ipediat banci maba ku kematen. Selaku Saitun, si tek man Tuhan idilo guna maba perubahen ku si mehuli itengah-tengah kalak jahat. Gegehta lit ibas keriahen ukurta ernalem man Tuhan bage pe ibas keriahen ukurta guna tetap erbahan si mehuli. Geluhta la ipengaruhi situasi doni si dem alu kejahaten tapi ikuasai kiniteken ras kebujuren. I bas sienda tentu perlu ipebelin biak simehuli dingen meneken si jahat.

V. PERTOTON

Bapa kami sini surga, ajari kami gelah ngasup nggeluh ibas kebujurenNdu, ernalem man baNdu ibas kerina situasi kegeluhen enda. Erkiteken keleng ate Jesus, kami ertoto. Amin.

VI. STUDI KASUS

Lit 2 (dua) kalak manusia e me si Rinto ras si Ripe. Rinto, sekalak pengusaha. Gelah pedas sukses dat untung, la ia segan nogok penjabat ras memanipulasi kontrak bisnis. Pembukuanna pe dua erbage, lain lapuren man pajak. Geluhna teridah sejahtera, dem kemewahen, megati tampil ibas acara sosial, nterem kalak sierngena ate man bana. I bas si e lit kalak ercian ate, lit ka si ngikutken perbahanenna. Ripe, sekalak pegawai negeri si bujur ras disiplin. Geluhna sederhana, gajina pas-pasen. Erkiteken si e Ripe, labo pernah ndatken perhatin ras penghargan i bas kalak sideban nari. E maka ia tertekan, frustrasi, rendah diri ras stres. I bas perdalinen waktu, Rinto menikmati kebayaken ras gaya hidup mewahna. Sementara, Ripe terus erjuang, kerja keras ras berintegritas. Kedungenna, ulah Rinto tereteh, itangkap seh bene kerina erta kebayakenna. Tapi Ripe, tetap konsisten i bas prinsip geluhna, seh dungna ia ngaloken penghargaan, erkiteken kiniulin ras kebujurenna. la pe ipromosiken ku jabaten si terganjangen. 

VII. DISKUSI

Diskusikenlah, pelajaren kai si banci ibuat arah studi kasus enda!

1. Turiken pengakapndu kerna si Rinto bagepe si Ripe

2. Kai jadi pesanndu man anak kempundu kerna biak si dua kalak enda? Asa bancina turiken, turi-turin enda man bana.

VIII. USULEN LAGU

1. KEE No. 399: 1, 2

2. KEE No. 170: 1, 3, 5.

3. KEE No. 450: 1 Kolekte PA

4. KEE No. 202: 1, 4

Pdt. Eliezer Pietje Sembiring