Tading Tadingen

BIMBINGAN PA SAITUN GBKP TAHUN 2026

TANGGAL, 23-29 Agustus 2026

Ogen : Josua 17:3-6

Suku Manase si arah Barat Lau Jordan

Indonesia:

[3]  Tetapi Zelafehad bin Hefer bin Gilead bin Makhir bin Manasye tidak mempunyai anak laki-laki, tetapi hanya anak perempuan. Inilah nama anak-anaknya itu: Mahla, Noa, Hogla, Milka dan Tirza.

[4] Mereka datang menghadap imam Eleazar, dan menghadap Yosua bin Nun, serta para pemimpin, dan berkata: ”Tuhan telah memerintahkan kepada Musa untuk memberikan milik pusaka kepada kami di tengah-tengah saudara-saudara kami.” Sebab itu diberikannya kepada mereka, milik pusaka di tengah-tengah saudara-saudara ayah mereka, sesuai dengan titah Tuhan.

[5] Demikianlah kepada suku Manasye jatuh sepuluh bidang tanah, selain dari tanah Gilead dan Basan yang di seberang Yordan,

[6] sebab anak-anak perempuan Manasye telah menerima milik pusaka di tengah-tengah anak-anaknya lelaki, sedang tanah Gilead ditentukan bagi anak-anak lelaki Manasye yang lain.

Karo:

[3] Selapehat anak Heper, anak Gileat, anak Mahir anak Manase, la lit anakna dilaki, tapi diberu kerina. Gelarna e me kap Mahlah, Nuah, Hogelah, Milkah, ras Tirah.

[4] Lawes ia ngadap man Imam Eleasar ras man Josua anak Nun ras man peminpin-peminpin bangsa e, jenari nina, “Enggo ipedahken TUHAN man Musa gelah man kami ras man kade-kade kami si dilaki, ibereken sada bagin taneh e jadi sikerajangen kami.” E maka, sue ras si enggo ipedahken TUHAN, man kalak enda ras man kade-kadena si dilaki, ibereken taneh.

[5] Em sabapna maka Manase ngaloken sepuluh bagin si jadi tambahen Gileat ras Basan arah Timur Lau Jordan,

[6] erkite-kiteken kesusurenna si diberu itetapken ngaloken taneh e bali ras si dilaki. Taneh Gileat itetapken man sikerajangen kesusuren Manase si debanna.

Tema: Seri Perbahanen man anak Dilaki ras Diberu.

Tujunna:

Gelah Saitun:

·       Nuriken kerna palas anak-anak Selapehat si diberu i bas mperjuangken hak warisna.

·       Nuriken ras rencana pengalamenna i bas ngaturken erta tading-tadingenna man anak dilaki ras diberu.

Metode: Studi Kasus

I. BENA KATA

Teptep jabu pasti ersura-sura gelah anak ipupus dilaki ras diberu sue ras pedah pasu pasu si isehken kalimbubu ibas kerja erdemu bayu i jambur, nina "jumpa matawari ras bulan", si nangkih mayang ras si nutu cimpa. Ertina Jumpa anak dilaki ras diberu si nerusken jabu jadi ingan metua orangtua. Tapi langa kabo tentu seh kerina si nisura. Banci jadi lit kange langa ibereken Dibata anak ipupus, tah pe lit kange labo lengkap. Dilaki kerina, tah diberu kerina. I bas si e Dibata enggo ngaturken si mehulina man banta, gia langa siakap si mehulina. Kai ibereken Dibata tentu e nge akap Dibata si mehulina, kune anak diberu kerina i bas jabu, langa nge akap Dibata kita ngasup ndidik anak dilaki, adi dilaki ka kerina ibereken Dibata langa nge akap Dibata kita ngasup ndidik anak diberu.

Kuga gia sekali pemere Dibata kubas jabu, katakenlah bujur man Tuhan, sebab Tuhan mereken si mehulina, anem gia langa siangka, pagin tangkas man banta. Anak i tengah tengah jabu e merupaken titipen Dibata, mari sipekena kena alu mehuli. Dilaki ras diberu seri ergana i lebe lebe Dibata, adi kune sibedaken erdosa kita man Dibata.

II. MPEGESI OGEN

I tengah tengah kalak Israil pe teridah membedaken anak dilaki ras anak diberu. Anak diberu ras anak anak, kurang iperhitungken i tengah-tengah kalak Israil. Contohna tupung kalak Israil ndarat i taneh Mesir nari lit teremna 600.000 kalak dilaki mbelin saja, la ikira diberu ras anak anak. Bage pe bas Jesus mere man 5000 kalak, alu 5 roti 2 ikan besur 5000 kalak, dilaki mbelin saja, la ikira diberu ras anak anak. Enda nuduhken maka i tengah-tengah budaya Israil anak dilaki nge iakap penting sebagai manusia, anak dilaki me siakap merupaken pasu pasu Dibata ku tengah jabu.

I bas Masmur 127:4, anak dilaki desken anak panah i bas tan si mbisa, sedangken anak diberu latersinget pe. I bas pembagin erta warisen rikutken budaya Israil lit hak anak si diberu daten tading-tadingen. E me sababna, Selapehat si anakna diberu kerina, erjuang guna ndahi Josua ras Imam Eleasar gelah ia pe daten tading-tadingen bapana (Bil. 27:7). Imam pe labo pang mutusken kerna pemindon Selapehat enda sebab melanggar budaya Israil, emaka isungkun Imam Tuhan, Nina Tuhan njawabsa maka anak si diberu pe berhak ndatken warisen i bas bapana nari (Bil. 36:2), tapi gelah ula ngkurangi taneh i bas sukuna, anak diberu e arus erjabu ibas sukuna, labanci erjabu ku suku si deban. Selapehat enggo mperjuangken gelah anak diberu dat warisen i bas taneh bapana nari. Emaka suku Jusuf si terbagi dua eme Efraim ras Manase dat taneh sepuluh bagin arah Timur Jordan, si jadi tambahen Gileat ras Basan. Kesusuren Israil, anak diberu itetapken ngaloken taneh bali ras anak dilaki.

III. PENGKENAINA

Budaya kalak Karo pe langa bo bali pengidah kerna anak berita si meriah. Sebab lit taneh tading-tadingen orangtua, dilaki ras diberu, terlebih-lebih i bas masa langa ngaloken labo dat bagin anak diberu, paling alokenna erta warisen berupa perhiasen, alat alat rumah tangga, tah emas adi kune Iit itadingken orangtua. Alasen kalak Karo sebab anak si diberu sereh ia man kalak si deban si lain merga. Emaka guna njaga taneh tading-tadingen e gelah ula sambar merga punana, emaka anak si dilaki ngenca daten warisen, anak si diberu la dat bagin. Tentu terlalu njulmit kal pengukuri orangtua nai kerna si e. Kerna pembagin warisen si bage labo terpertahanken sebab dung na berkembang pemikiren labo wajar sebab anak diberu ras anak dilaki radu igelari anak i bas jabu. 'Di kune pudi-pudi metua e sakit orangtua, anak dilaki ras diberu nge simpekena-kenasa. Janah labo kurang terem orangtua hanya i bas jabu anak si diberu ngenca meriah akapna inganna tading. Emaka kalak karo pe berubah pikiren, arih arih i bas jabu maka ibahan me tading-tadingen si kerajangen anak si diberu, la gia seri belang taneh i bas pembagin man si dilaki ras si diberu. Rikutken undang undang pemerintah si berlaku seri nge anak dilaki ras anak diberu, e maka lit nge kalak Karo enggo ngelakoken pembagin erta warisen seri pengalonna anak si dilaki ras si diberu. Kenca enggo ngaloken berita si meriah, lit nge jabu ngaturken pembagin erta warisen alu prinsip "rutang simegegeh man si lamegegeh". Erta tading-tadingen e ibereken man anak rikutken kecibalna. Pengalon kalak si mbur ras si kertang berbeda, janah perbedaan e teraloken i bas si ersenina ras erturang. Lit pe anak e ladaten lanai bo akapna dalih gelah turangna ras senina la akapna mberat, sebab arah si deban enggo igejapkenna pemere Dibata lebih asa tading-tadingen. Metenget lah kita orangtua ola rukur kerna erta doni si jadi tading tadingen man anak ras kempu, tapi ndauh lebih penting asa warisen erta doni eme warisen kiniteken, warisen Kata Dibata, warisen kekelengen. Adi e si warisken man anak kempunta, sitik ngenca erta doni enda si warisken, ban sitikna ia nggeluh sikeleng kelengen. Adi mbue si warisken erta doni enda tama tengtengna kerina ia nggeluh alu dame. Tapi kune warisen kiniteken lalit, warisen kekelengen kosong, maka mbue pe erta doni enda wariskenndu ban buena maka ia rubat. Kune sitik ngenca iwariskenndu ban sitikna ia rubat, kugapa pe labo tengteng man bana. Sebab lalit warisen kekelngen ras kata Dibata. Emaka wariskenlah Kata Dibata e me erta simehergana.

IV. PERTOTON

O Tuhan ajari kami kuga mereken warisen si pentingna man anak ras kempu kami, gelah kerina anak ras kempu kami nggeluh sikeleng-kelengen, malem ate kami natap anak-anak ras kempu kami ersada arih. Kerina ia nggeluh sikeleng-kelengen, bagepe keleng pe atena kami orangtuana, gelah ketuahen ia kerina, sangap ia nggeluh, ipegedangken umurna i bas doni enda, erkiteken pemasu masunNdu. I bas Tuhan Jesus Kristus kami ertoto. Amin.

V. DISKUSI

1.    Kuga sedekah enda pengidahndu kerna pembagin erta warisen, Kenca itadingken orangtuana, reh teridahna nge ersada tah reh sirangna,? Kai sebabna turiken gelah jadi pertenget man orangtua, i bas nadingken tading-tadingen.

2.    Ise nge si salah adi lit si ersenina tah erturang erpekara seh ku pengadilen soal tading-tadingen? Turiken pengakapndu!

VI . USULEN LAGU

1. KEE No. 293 :1,2

2. KEE No. 302: 1,2

3. KEE No. 316:1,2

4. KEE No. 309:1,2

Pdt. Diman Ginting