Nandai Dibata

BIMBINGAN PA SAITUN GBKP TAHUN 2026

TANGGAL, 26 April-2 Mei 2026

Ogen : Matius 28:19

Jesus ncidahken diriNa man ajar-ajarNa

Indonesia:

[19]  Karena itu pergilah, jadikanlah semua bangsa murid-Ku dan baptislah mereka dalam nama Bapa dan Anak dan Roh Kudus,

Karo:

[19] Laweslah ku kerina bangsa manusia, bahanlah ia jadi ajar-ajarKu: Peridiken ia ibas gelar Bapa, gelar Anak, ras gelar Kesah Si Badia,

Tema: Dibata Si Telu Sada

Tujunna:

Gelah Saitun:

1. Ngantusi kerna Dibata Sitelu Sada (Trinitatis) sue ras konfesi GBKP

2. Naksiken maka arah Peridin Pengajaren ras Ngikutken kai sipedahken Tuhan eme dalannta petandaken Dibata Sitelu Sada man kalak sideban.

Metode : Diskusi

I. BENA KATA

Ibas konfesi GBKP (pokok-pokok pengakun kiniteken) maka GBKP ngakuken Dibata Si Telu Sada (Trinitas) sue ras si isingetken i bas Pustaka Si Badia Padan Si Mbaru icidahken perjumpan Dibata Sitelu Sada eme Bapa, Anak ras Kesah Si Badia perpulungen Badia. Dibata Bapa eme Dibata sinjadiken langit ras doni bagepe ras kerina isina. Dibata Anak eme Jesus Kristus anak Dibata si Tonggal si ngelai doni enda alu penebusen i bas dosa manusia nari, seh Ia mate tapi keke ka Ia mulihi jenari nangkih ku surga seh kedungenna reh ka pagi Ia mulihi. Dibata Kesah eme Kesah Si Badia sinampati, ngapuli si ibereken Dibata guna ngajari manusia ngangkai sura-sura Dibata ras ngusih kerna kai sienggo iajarken Jesus Kristus.

II. MPEGESI OGEN

Kenca Jesus keke i bas simate nari maka icidahkenNa dirina 40 wari man ajar-ajar ope denga IA nangkih ku Surga. Waktu si lit enda ipakeken Jesus guna nehken pengajaren gelah berita simeriah e tetap ipeseh ajar-ajar seh ku belang-belang doni. Tugas nehken berita jadi tanggung jawab ajar-ajar si enggo ngaloken keselamaten ras pengajaren i bas Jesus nari.

Tupung Jesus jumpa ras ajar ajarNa sisepuluh sada kalak (Judas lanai ije erkiteken enggo mate ndelis) maka Jesus nehken Misi man ajar-ajar guna lawes ku kerina bangsa manusia lako njadiken ajar-ajar Kristus. Kristus mereken penugasen enda man ajar-ajarNa erkiteken Ia jine pe ngalokenca i bas Dibata Bapa nari. Ajar-ajar ipindo guNa mperidiken kalak sitek man Jesus Kristus gelah iperidiken i bas gelar Bapa, Anak ras Kesah Si Badia. Ijenda Jesus ncidahken kiniersadaan Bapa, Anak ras Kesah Sibadia ibas ndahiken dahin keselamaten man manusia.

Tuhu pendahin Bapa, Anak ras Kesah Sibadia teridah arah erbage-bage dampar i ja Dibata Bapa eme Dibata si jandiken kerina sinasa lit i doni ras i surga. Dibata Anak eme Jesus Kristus si enggo reh nelamatken manusia ras doni enda si enggo ndabuh ras ibengketi dosa. Jenari Dibata Kesah eme Kesah Si Badia si tetap erdahin nemani kita gelah tetap nggeluh ndarami ras ndalanken bagi singena ate Dibata. Arah enda maka Dibata Bapa, Anak Ras Kesah Si Badia la terpesirang sada ras sidebanna.

III. PENGKEΝΑΙΝΑ

1. Kita nembah man sada Dibata saja si teridah ibas sada kiniersadan selaku Dibata si Telu sada. Tuhu labo kita ngasup nuriken kerna Dibata sitelu sada e alu tangkas rikutken pemetehta erkiteken keterbatasennta selaku tinepaNa, bagi kita la ngasup ngantusi kerna kuasa ras pendahin Tuhan siicidahkenNa i tengah-tengah kegeluhenta. Pendahin Dibata Bapa, Anak ras Kesah Sibadia merupaken sada kesatuan si la terpisahken sada ras sidebanna. Adi sialoken ras sicakapken kerna Dibata maka si Telu terhubung sada kesatuan ibas persadan.

2. Jesus jine singataken man banta kerna kalak sitek iperidiken i bas gelar Bapa, Anak ras Kesah Sibadia eme sababna maka kita pe ngaloken kerna Trinitas, Dibata sitelu sada si ersada ibas 3 pendahin (kekaryaan). Jesus labo pernah ngajarken kita guna nembah man Dibata silebih dari sada (politeisme) tapi kita iajarkenna guna tek man Dibata si sada saja ngenca

3. I bas gerejanta GBKP kerna peridin, alu cara ipercik entah iselamken labo perlu ipersoalken sebab labo e si paling penting. Tuhu tradisi gerejanta kalak si iperdiken alu cara ipercikken takalna, sipenting adi ia tek man Jesus janah adi enggo iperidiken ibas gelar Bapa, Anak ras Kesah Si Badia maka ia enggo seri ras pengakun konfesi GBKP

IV. PERTOTON

Bujur Tuhan enggo icidahkenNdu kuasa ras keleng ateNdu maka kam Dibata si Mada Kuasa. Sinelamatken ras si tetap ngarak ngarak kegeluhen kami arah pendahin Bapa, Anak ras Kesah Si Badia. Aminna terbatas kengasupen kami ngatusisa kerna kebeberadaaNdu tapi rikutken kiniteken kami maka Kam kap Dibata si telu Sada.

V. Diskusi

1. Turiken uga pengangkannta kidekah enda kerna Dibata si Telu Sada !

2. 2. Uga caranta petandaken Dibata Si Telu Sada man kalak sideban gelah tangkas man bana kerna Dibata si isembah kita?

VI. ENDE-ENDEN

1. KEE 196 :1,4

2. ΚΕΕ 185 :1,2,3

3. KEE 372:1-

4. KEE 99:1.2

Pdt. Rehpelita Ginting